Xelkê Bakur û Rojhilatê Sûriyeyê bi beşdariya sazî û dezgehên Rêveberiya Xweseriya Demokratîk û Heyva Sor a Kurd beşa ewil a konvoyên alîkariyên mirovî di 17’ê Adarê de şand herêma peravê. Alîkariya mirovî ku 6 hezar paketên xurekê, 2 hezar û 500 koliyên paqijiyê û 350 ton ar pêk dihat, belavî mexdûrên komkujiiyê yên li herêma peravê hate kirin.
Amadekariyên konvoya duyemîn a alîkariyê jî di 10’ê Nîsanê de destpê kir û di 11’ê Nîsanê de ji Qamişloyê bi rê ket. Konvoya alîkariyê di 12’ê Nîsanê de jî rêya xwe ji Tebqayê ber bi bajarên peravê ve domand. Di konvoya duyemîn a alîkariyê de jî 14 hezar paketên xurekê û tenduristiyê cih digrin. Berdevka Ofîsa Jinan a Heyva Sor a Kurd Şirîn Silêman Xelîl ku tevkarî gihandina konvoya alîkariya mirovî ya yekemîn û duyemîn ji bo herêma peravê kir, têkildarî seferberiya alîkariyê ya Heyva Sor a Kurd û rewşa gelê ku li bajarên peravê dijîn ji ajansa me re axivî.
BI KÊFXWEŞIYEKE MEZIN HATIN PÊŞWAZÎKIRIN
Şirîn Silêman Xelîl diyar kir ku ji ber komkujiya li dijî Elewiyên li peravê dijîn ziyaneke mezin gihîşt wan û got, “Ji ber komkujiyan tirseke mezin di nava civaka Elewî de heye. Ziyanên mezin ên madî û jiyanî dîtin. Ji ber komkujiyan nikarin ji malên xwe derkevin û nikarin pêdiviyên xwe yên jiyanê bi cih bînin. Zarokên wan naçin dibistanê û ji bo lîstikê jî dernakevin derve.”
Şirîn Silêman Xelîl anî ziman ku Heyva Sor a Rêveberiya Xweseriya Demokratîk a Bakur û Rojhilatê Sûriyeyê ji hêla Elewiyan ve bi kêfxweşiyeke mezin pêşwazî hat pêşwazîkirin û wiha berdewam kir: “Di serdana me ya yekem a li peravê de me bi erênî pêşwazî kirin. Daxwaz û bendewariya wan ji Herêma Bakur û Rojhilatê Sûriyeyê ew bû ku ev alîkarî û hevgirtin berdewam bike.”
‘EM HER TIM JI ALÎKARIYÊ RE AMADE NE’
Şirîn Silêman Xelîl destnîşan kir ku Heyva Sor a Kurd alîkariyên mirovî weke erk û berpirsyarî dibîne û wiha pêde çû: “Em bi gelek saziyên alîkariyê yên herêmê re di serî de Kongra Star û saziya alîkariyê ya Mezopotamya re di nava diyalogê de ne. Ji ber pêwîstiyên civaka Elewî me biryar da ku em alîkariyê bigihînin peravên deryayê. Niha pêwîstiya Elewiyan bi alîkariyê û hevgirtinê heye.”
‘ASTENGÎ VALA DERKET’
Şirîn Silêman Xelîl da zanîn ku karwanê alîkariyê yê ewil rastî astengiyan hat û wiha dewam kir: “Hikûmeta Şamê nehişt ku em bi logoya Heyva Sor a Kurd alîkariyê derbasî peravê bikin. Li ser vê yekê me logoyên xwe rakirin. Weke Heyva Sor a Kurd, armanca me ew bû ku ji logoyan wêtedir, em alîkariyê bigihînin Elewiyan û di vî alî de em gihîştin armanca xwe. Karwanê ewil gelek caran di lêgerînê de derbas bû. Em li dijî lêgerînan jî derneketin. Ji ber ku daxwaza me gihandina alîkariyê bû. Me nikarîbû Elewiyan bi tenê bihêlin. Prosedurên wan ji bo me ne pirsigrêk bûn, lê me astengiyên wan vala derxist.
‘DIVÊ RÊXISTINÊN ALÎKARIYÊ YÊN NAVNETEWEYÎ PIŞTGIRIYA HEYVA SOR A KURD BIKIN’
Şirîn Silêman Xelîl diyar kir ku wan bi karwanê alîkariyê yê ewil re alîkarî gihandine nêzî 60 gundan û wiha got: “Me girîngî da wan kesên ku rastî komkujiyê hatin û di tengasiyên aborî de bûn. Mebesta min ji alîkariya mirovî ne tenê piştgiriya aborî ye, mebesta min piştgiriya manewî ye.”
Şirîn Silêman Xelîl anî ziman ku divê sazî û rêxistinên alîkariyên mirovî yên navneteweyî çavên xwe ji komkujiyan re negirin û alîkariyên mirovî bikin û wiha dawî li axaftina xwe anî: “Pêwîste rêxistinên navneteweyî yên alîkariyên mirovî hem guh bidin şahidiya Heyva Sor a Kurd û hem jî rasterast bi Elewiyan re di nava diyalogê de bin. Em dikarin bi diyalogê alîkariyê bigihînan wan. Bi sed hezaran mirov li bajarên peravê li benda alîkariyê ne. Ne pêkan e ku Hevya Sor a Kurd pêwîstiyên wan tevî bi tenê bi cih bîne. Ji ber vê yekê divê rêxistinên navneteweyî yên alîkariya mirovî piştgiriyê bidin Hevya Sor a Kurd.”
