Li Girtîgeha Girtî ya Jinan a Sîncan/Enqereyê 12 girtiyên jin ku hin ji wan 30 sal in girtî ne, nayên berdan. Endama Şaxê Enqereyê ya Komeleya Hiqûqnasan a ji bo Azadiyê (OHD) parêzer Sîpan Cîzrelî ji ANF’ê re axivî û bi bîr xist ku sala 2021’ê bi guhertina qanûnî re di berdana bi şert de krîtera ‘rewşa baş’ hate zêdekirin û got, bicihanîna vê krîterê bi rengê ‘ferzkirina poşmaniyê’ ye. Cîzrelî got, “Li tevahiya Tirkiyeyê li 119 girtîgehan girtiyên siyasî hene. Li van girtîgehan bi giştî yek an jî du caran berdan tê taloqkirin, lê belê bi biryarên Desteya Çavdêriyê re berdana bi şert tê kirin. Li Girtîgeha Girtî ya Jinan a Sîncanê ji sala 2021’ê û vir ve ti girtiyên jin nekarîn ji berdana bi şert sûdê werbigirin.”
BERDANA BI ŞERT A 24 GIRTIYÊN JIN HATE TALOQKIRIN
Parêzer Cîzrelî anî ziman ku weke komele di lêkolînên xwe de tespît kirin ku bi giştî berdana 24 girtiyên siyasî yên jin hatiye astengkirin û got, “Ji van 24 jinan 13 ji wan piştî temamiya cezayê li wan hate birîn temam bû hatin berdan. Niha di halê hazir de berdana bi şert a 12 girtiyên jin tê astengkirin. Li gorî nirxandina girtiyên jin, Girtîgeha Jinan a Sîncanê weke ‘herêma pîlot’ hatiye hilbijartin. Jİ ber vê yekê jî berdana girtiyan bi rêk û pêk tê astengkirin, her wiha hin caran berdan 6 cana ji aliyê desteya çavdêriyê ve hatiye astengkirin. Li tevahiya Tirkiyeyê li girtÎgeheke din kiryareke bi vî rengî ya bi rêk û pêk nîne. Her wiha li girtîgehên din ên Sîncanê yên li heman kampusê jî kiryareke bi vî rengî nîne.”
33 SAL IN GIRTÎ YE LÊ NAYÊ BERDAN
Parêzer Sîpan Cîzrelî ragihand ku beşeke mezin a jinan salên dûr û dirêj in girtî ne, vê yekê bandoreke cidî li tenduristiya wan kiriye û got, “Niha ji 12 jinên li Girtîgeha Jinan a Sîncanê berdana wan tê astengkirin 5 ji wan 30 sal in girtî ne. Mînak Sermîn Demîrdag 33 sal in girtî ye. Girtîmayina demdirêj, mayina li qada girtî li gel bandorên psîkolojîk û fîzîkî dibe sedema pirsgirêkên tenduristiyê. Astengkirina berdanê her wiha wergirtina xizmetên tenduristiyê jî dereng dixîne.”
Parêzer Cîzrelî diyar kir ku çar sal in ew biryarên Desteya Çavdêriya Îdarî ya li Girtîgeha Jinan a Sîncanê dişopînin û destnîşan kir ku ti bingeheke hiqûqî ya biryaran nîne. Parêzer Cîzrelî got, “Dema ku me biryarên Desteya Çavdêriya Îdarî lêkolîn kir, dîtin ku nirxandinên têkildarî rewşa baş, bi temamî bi rengê kopy-pêve bike hatine amadekirin. Di biryaran de ti hêmaneke şexsî nîne, ji bo her girtiyekê heman hincet hatiye dubarekirin.”
