Karwanê duyemîn ên koçberên Efrîn di çarçoveya lihevkirina 29’ê Çileyê ya di navbera QSD’ê û hikumeta demkî ya Sûriyeyê ji bo vegera Efrînê bi rê ket.
Ji saetên sibehê ve koçber li Çerxerêya Yûsif Gulo ya li bajarê Qamişlo kom bûn û ji wir bi rê ketin.
Li gorî agahiyên ku Meclisa Koçberên Efrîn û Şehbayê dane me karwan ji 200 malbatan, 80 wesayîtên gel ên taybet, 48 wesayîtên ku barê milet hilgirtine û 14 basan, pêk tê.
Koçberên ku berê xwe dane cih û warên xwe ji navçeya Raco û navenda bajarê Efrîn in.
Bi karwanê re rêxistina ku bi navê “El-Xiwez El-Bedaa” tê naskirin hebû.
Cîgirê Fermandarê Giştî yê Hêzên Ewlekarya Hundirîn ên Parêzgeha Hesekê Mehmûd Xelîl (Siyabend Efrîn) li ser hesabê xwe yê X’ê bi postekê vegera karwanê duyemîn eşkere kir. Xelîl da zanîn ku dê karwan li ser rêya M4 bigihêje Efrîn.
Karwanê yekemîn ê ku ji 400 malbatan pêk dihat, 9’ê Adarê vegeriyabûn Efrîn.
