Koordînasyona Civaka Êzidî ya li Ewropayê (KCÊ-E) bi daxuyaniyekê cejna Êzî di serî de li civaka Êzidî, li tevahiya gelê Kurd û mirovahiyê pîroz kir û diyar kir ku ew hêvîdar in, ev cejn bibe wesîleya aştî û aramiyê ji bo tevahiya gelên cîhanê.
Di peyama KCÊ-E’yê de hate bibîrxistin ku civaka Êzidî li welêt û li seranserê cîhanê ji 2’ê Kanûnê û vir ve pêşwaziyê li rojî û cejnan dike û hate gotin, piştî pîrozkirina cejnên Şêşims û Xwedanan, di qonaxa dawî de rojiya Êzî tê kirin û 19’ê Kanûnê wê bi kelecaneke mezin cejn bê pîrozkirin.
Li ser wateya rojiyan hate gotin, “Li gorî baweriya me di tevahiya pêvajoya rojiyan de mirov bi xwe re di warê nefsî de paqijbûn û nûbûnekê çêdike. Di warê ruhî û derûnî de jî xwe li ser rêya Êzdatiyê xurt û qewîn dike. Her wiha ji me tê xwestin, di dema rojiyan de xêr û xêratê miriyan bê dayin, piştgirî û alîkarî bi kesên hewcedar re bê kirin.”
‘XÊR Û XÊRATÊN XWE JI ÊZIDIYÊN LI KAMPAN, LI ŞENGALÊ, KOÇBERÊN SERÊKANIYÊ Û EFRÎNÊ RE BIŞÎNIN’
KCÊ-E’yê bi vê mebestê bal kişan ser hebûna bi hezaran Êzidiyan li kampên penaberan ên li Başûrê Kurdistanê, şert û mercên li Şengalê, koçberên Serêkaniyê û Efrînê û got, “Erkê her mirovekî Êzidî ye ku li van kesên hewcebûna wan bi alîkariyê heye xwedî derbikeve. Her mirovekî me dikare xêra xwe bi rê ya Konto’yê SMJÊ ( Siwana Meclisên Jinê Êzidi ) bişînin.
Êzdiyên dilsoz, girînge ev çanda qedîm ji aliyê civaka me ve were parastin. Pêwîste em weke civak û saziyê wê di vê têgihiştin û zanistiyê de bin, çanda me û baweriya me di bin xeteriyeke mezin de ye. Eger em li nirxên xwe xwedî dernekevin, kes nayê me naparêze, rêveberiyê ji me re nake û azadiya me bi hêsanî diyarî me nake. Em neçar in tifaqa xwe çêkin, di her milî de hêza xwe xurtir bikin û çarenûsa xwe bi destê xwe binivsînin.”
Koordînasyona Civaka Êzidî ya li Ewropayê destnîşan kir ku divê civaka Êzidî bi taybetî xwedî li peyama Rêber Apo ya ji bo aştî û civaka demokratîk derkevin, pêşengiyê ji pêvajoyê re bikin û got, “Divê, ji bo nasandin û parastina bawerî û çanda Êzdatiyê, civaka me li ku derê be bila be girînge bi ruhê seferberiyê li erka xwe xwedî derkeve û li ser bingeha civaka demokratîk xwe bi rêxistin bike. Dîsa girîng e em weke civaka Êzîdî û saziyê wê bi hemû hêza xwe ji bo azadiya fîzîkî ya Rêberê Gelê Kurd têkoşina xwe xurtir bikin.
Li ser vî esasî em wek Koordinasyona Civaka Êzidî ya li Ewropayê cejna hemû civaka xwe ya li tevahiya cîhanê pîroz dikin û bang li gelê xwe dikin ku bi girseyî tevlî deverê cejna Êzi lê tê piroz kirin bibin.”
