Hevserokatiya Konseya Rêveber a KCK’ê têkildarî pîrozbahiyên îsal ên Newrozê daxuyaniyek da.
Daxuyanî bi vî rengî ye:
“Newroz ku ji bo nîşandana îradeya gelê Kurdistanê xwedî cihekî gelekî girîng e, îsal ji demên derbasbûyî bêhtir bi tevlîbûneke xurt îradeya gelê Kurdistanê nîşan da û ji aliyê siyasî û civakî ve derbasî nava rûpelên dîrokê bû. Hem ji aliyê tevlîbûna xurt ve, hem jî bi coş û peyamên xwe yên siyasî Newroza 2025’an bû asta herî bilind. Di serî de çar parçeyên Kurdistanê li her devera ku Kurd lê ne Newroz bi coşeke mezin, bi stranên azadiyê, bi govend û tilîliyan hate pîrozkirin, qadên Newrozê bi dirûşmên azadiyê yên bi milyonan mirovî hejiyan. Gelê Kurd bi pîrozkirina Newrozê di asta herî bilind de her cûre êrîş, komplo û lîstikên li hemberî xwe pûç kir û îradeya xwe bi şênberî raxist pêş çavan. Ji ber tevlîbûna xurt a li Newrozê em gelê xwe ji dil pîroz dikin û sekna wan a berxwedêr silav dikin.
DI NEWROZÊ DE DAXWAZA AZADIYA FÎZÎKÎ YA RÊBER APO HATE KIRIN
Newroza 2025’an li çar parçeyên Kurdistanê bi coş û tevlîbûneke mezin derbas bû. Gelê Bakurê Kurdistanê bi milyonan mirovî daket qadan, ji Serhedê heta Dersimê, ji Botanê heta Firatê li her devera Kurdistanê Newroz bi xurtî pîroz kir. Newroza Amedê jî bû asta herî bilind a vê yekê. Îsal gelê Rojhilatê Kurdistanê ji demên derbasbûyî bêhtir bi xurtî tevlî pîrozbahiyên Newrozê bû. Ruhê ‘Jin, Jiyan, Azadî’ li Newrozê serwer bû. Newroz bi heybeteke mezin hate pîrozkirin. Li Rojavayê Kurdistanê di Newrozê de coş û baweriya şoreşê hebû. Sekn û biryardariya berxwedanê îsal Newroza Rojava ji her demê bêhtir bi heybet kir. Gelê Başûrê Kurdistanê di serî de li Qendîlê li her deverê Newroz bi coşeke mezin pîroz kir. Di hemû pîrozbahiyan de yên li çar parçeyan, daxwaza azadiya fîzîkî ya Rêber Apo bi xurtî hate qîrîn û xwedî li banga aştî û civaka demokratîk hate derketin. Di Newrozê de xeta welatparêzî, têkoşîn û azadiya Rêbertî li pêş bû, gelê Kurd hesreta xwe ya bi azadî û yekîtiya neteweyî anî ziman.
Di serî de derveyî welat li gelek deveran Newroz hîn jî tê pîrozkirin. Mîna li Kurdistanê li derveyî welat jî gelê me Newrozê bi coşeke mezin pîroz dike. Bi hesreta Rêbertiya Azad û Welatê Azad, Newroz ji aliyê gelê me ve ji her demê bêhtir bi coş hate pîrozkirin. Em Newrozê careke din li gelê xwe yê li derveyî welat ê bi coş Newroz pîroz kir û dostên xwe pîroz dikin.
BI XURTÎ XWEDÎ LI BANGA DÎROKÎ YA RÊBER APO HATE DERKETIN
Bêguman ya ku Newroza îsal bi wate û dîrokî kir, ‘Banga Aştî û Civaka Demokratîk’ ya Rêber Apo bû. Di Newrozê de gelê Kurd bi xurtî bersiv da banga dîrokî ya Rêber Apo. Bi dirûşma ‘Rêbertiya Azad Civaka Demokratîk’ bêyî şik û gumanan nîşan da ku xwedî li banga dîrokî ya Rêber Apo derdikeve. Her dever û her kêlî bi dirûşmên ‘Bijî Serok Apo’ dagirt û dilsozî û hezkirina xwe ya bi Rêber Apo re nîşan da. Bi kurtasî gelê Kurd heqê dirûşma Newroza 2025’an da, Newroz weke Newroza ‘Rêbertiya Azad Civaka Demokratîk’ pêşwazî kir. Bêguman di Newrozê de dilsoziya xurt a bi Rêber Apo re û xwedîderketina bi xurtî ya li banga dîrokî ya Rêber Apo di heman demê de bû peyama Newrozê ya gelê Kurd. Di Newrozan de peyamên gelê Kurd xwedî girîngiyeke dîrokî ye. Ji ber ku gelê Kurd her tim di Newrozê de bi peyamên xwe îradeya xwe nîşan dide. Di Newroza îsal de jî gelê Kurd bi dirûşmên xwe îradeya xwe nîşan da. Gelê Kurd bi helwesta xwe ya şênber û bi biryar diyar kir ku divê sîstema Îmraliyê êdî ji holê bê rakirin û Rêber Apo ji aliyê fîzîkî ve azad bibe. Peyama Newroza 2025’an ev e. Gelekî girîng e ku ev peyama gelê Kurd a ku di Newrozê de nîşan da, rast bê fêhmkirin. Şertê dostaniya bi Kurdan re, şertê jiyana bi hev re ya bi gelê Kurd re ev e. Nêzîkatiyên ku vê yekê ji nedîtî ve bên, eşkere ye ku dijminatiyê li gelê Kurd dike. Aqûbeta yên bi vî rengî nêzîk dibin weke ku gelek caran di dîrokê de ispat bû, wê tinebûn be. Bi kurtasî yên ku dixwazin dijminatiyê bi gelê Kurd re nekin, divê îradeya gelê Kurd li ber çavan bigirin.
DIVÊ SÎSTEMA ÎMRALIYÊ JI HEV BÊ BELAVKIRIN, AZADIYA FÎZÎKÎ YA RÊBER APO PÊK WERE
Pirsgirêka Kurd gihîştiye wê astê ku êdî çareseriyê ferz dike. Reva ji çareseriya pirsgirêka Kurd êdî nabe. Newrozê ev rastî careke din bi şênberî raxist pêş çavan. Em di wê baweriyê de ne ku çareseriya herî ast a pirsgirêka Kurd çareseriya li ser bingeha siyasî demokratîk e, ji bo ev yek pêk were em têdikoşin. Rêber Apo bi banga xwe ya ‘Aştî û Civaka Demokratîk’ a dîrokî re îradeya xwe ya çareseriya demokratîk a pirsgirêka Kurd careke din bi xurtî nîşan da. Gelê Kurd jî di Newrozê de careke din nîşan da ku ew dilsozê vê îradeyê ye. Ya ku divê bê kirin ew e ku li gorî vê yekê gav bêne avêtin, ya esasî jî ew e ku ji bo pêvajo bi pêş ve biçe û bi ser bikeve, sîstema Îmraliyê ji hev bê xistin, Rêber Apo ji aliyê fîzîkî ve azad bibe, bibe xwedî şert û mercên jiyanê û kar ên azad.
Rêber Apo û gelê Kurd ev îradeya xurt nîşan da, li hemberî vê yekê jî gavên pêwîst divê tavilê bêne avêtin. Lê belê heta niha ji aliyê dewletê ve ti gav nehatiye avêtin ku ev yek weke pirsgirêkeke nêzîkatiyê derdikeve pêşberî me. Çareseriya pirsgirêka Kurd ku ji aliyê cewherî ve pirsgirêkeke demokratîkbûnê ye, di dma dawî de zext, girtinên li hemberî Kurdan, hêzên demokrasiyê û muxalefetê nîşan dide ku desthilatdarî ji çareseriya pirsgirêka Kurd dûr e. Nêzîkatiyên antî demokratîk ên desthilatdariya AKP’ê nîşan dide ku bi erênî nêzî çareseriya pirsgirêkê nabe, dixwaze pêvajoyê li gorî berjewendiyên xwe yên teng bi kar bîne. Pirsgirêka Kurd pirsgirêkeke giran û bingehîn e, eşkere ye ku bi nêzîkatiyên teng ên desthilatdariyê nikare rabigire. Eşkere ye ku nêzîkatiyên bi vî rengî çawa ku heta niha rû da, ji niha û pê ve jî wê ji aliyê gelê Kurd ve bi erênî neyên pêşwazîkirin. Em baş zanin ku heta mejî û nêzîkatiyeke demokratîk nebe Tirkiye demokratîk nabe, pirsgirêka Kurd çareser nabe.”
