Siyasetmedar, nivîskar û helbestvan Hamît Geylanî duh li Enqereyê li nexweşxaneya ku lê dihat dermankirin jiyana xwe ji dest da.
Hevserokatiya Konseya Rêveber a KCK’ê, ji ber wefata Hamît Geylanî peyamek sersaxiyê weşand.
Di peyama KCK’ê de ev tişt hate gotin, “Em bi xemgînî hîn bûn ku hevalê me yê welatparêzê hêja Hamît Geylanî jiyana xwe ji dest daye. Em ji malbat, xizm û dostên wî, her wiha ji gelê welatparêz ê Colemêrg, tevgera siyasî ya Kurd û gelê Kurd re sersaxiyê dixwazin.
Hamît Geylanî mîna ewladekî welatparêz ê gelê Colegmêrgê, li hemberî êşên ku gelê Kurd kişandiye, neheqî, bêhiqûqî, înkar, asîmîlasyon û rastiya qirkirinê ya pê re rû bi rû maye, bêhelwest nemaye û bi hişmendiya berpirsyariya li hemberî gelê Kurd di qada siyaseta demokratîk de tevlî têkoşîna azadiyê bû.
Bi gelek hevrêyên giranbuha, ji pêşketina têkoşîna demokrasiyê û siyaseta demokratîk re pêşengî kir, tevkariyên girîng kir. Heval Hamît Geylanî jî rewşenbîr û nivîskarek bû. Bi hunera xwe têkoşîn, welatparêzî, êşên gelê Kurd û şiyarbûna wan anî ser ziman. Di vî warî de tevkariyên mezin li têkoşînê kiriye.
Mîna gelek hevrêyên xwe yên pê re têkoşiya, Hamît Geylanî jî bi zor û zehmetiyên mezin re rû bi rû ma. Gelek caran rastî zext û zordariyê hatiye, gelek caran hatiye binçavkirin, lêpirsîn hatiye kirin, hatiye girtin û êşkence lê hatiye kirin. Lê belê serî li ber van hemû zext, binçavkirin, girtin û êşkenceyê netewand û dest ji têkoşîna xwe berneda. Ev jiyan û sekn helbet gelekî watedar û bi nirx e. Li hember vê têkoşîna watedar û bi nirx ya ku wî daye em bi hurmetî bibîr tînin.”
