Platforma Konfederasyona Sendikaya Karkerên Cameweriyê (KESK) ji bo kesên ku bi rêya Biryarnameyên di Hikmê Qanûnê de (KHK) ji karê xwe hatin dûrxistin, bi dirûşmeya “Em ê karê xwe paşve bistînin” ji Amedê ber bi Enqereyê ve dest bi meşê kir. Meşa ku dê 5 rojan bidome li Amedê destpê kir û dê li Riha, Semsûr, Dîlok, Edenê û Mersînê û herî dawî li Enqereyê bi dawî bibe.
Beriya meşê meşvan di destpêkê de li Qada Şex Seîd a Amedê kom bûn û heta edliya Amedê meşiyan. Di meşê de pankarta “Li dijî bêhiqûqî em dimeşin” vekirin û dirûşma “Bijî Berxwedana Kedkaran” berzkirin. Di meşê de Hevserokê Giştî yên KESK’ê, parlamenterên partiyên siyasî, endam û rêveberên KESK’ê û gelek kes amade bûn. Girse dema ku hat pêşiya edliya Amedê daxuyanî dan. Hevseroka Şaxa BES’ê ya Amedê Guneş Ozel daxuyanî da.
Guneş Ozel, diyar kir di ser OHAL’ê re 7 sal derbas bûne, lê bandora vê hêj jî berdewam dike û got: “Dema OHAL’ê 125.612 kes bi rêya KHK’ê ji kar hate dûr xistin. 4259 ji wan girêdayî sendikayên KESK’ê bûn. Piştî van îxracan gelek kesan jiyana xwe dest dan. Hin ji wan paşê biryara vegera wan a kar hat danîn. Lê tu berpirsiyar nehat darizandin.”
Guneş Ozel, destnîşan kir ku îro darazî di bin destê desthilatdariyê de ye û ev tişt got: “Tu mafê sendikayî tune ye. Ji bo wê em ji Amedê heta Enqerê dest bi meşê dikin. Em ê daxwazên xwe bikin rojeva Meclîsê û û Wezareta Edaletê. Em dibêjin faaliyetên sendîkayî ne sûc e, bila kesên KHK’yî vegerin ser karên xwe.”
Piştî daxuyaniyê Hevserokê Giştî yê KESK’ê Ahmet Karagoz, axivî û diyar kir ku wan heta îro dengê xwe bilind kir lê nehatiye bîhistin û wiha got: “Gelek hevrêyên me hatin îxrackirin. Lê sedem nehat gotin. Em li vir dibêjin ji bo ku em li dijî şer in, ligel gelê Kurd in, ji bo faaliyetên sendîkayî em hatin îxrackirin. Gotin qey dê KESK bitirse, lê li pêşiya wan KESK heye, îro ev dîmen vê nîşan dide.”
Piştî daxuyaniyê meşvan ber bi Rihayê ve rê ketin.
