Komeleya Hiqûqnasan a ji bo Azadiyê (OHD) ragihand ku bi daxwaza bicihanîna ‘pîvana hêviyê’ wê di 27’ê Sibatê de li Amedê meşekê lidar bixe. Meş wê li navçeya Sûrê saet di 14:00 de li ber Mizgefta Mezin destpê bike û li ber Edliyeya li Amedê bi dawî bibe. Piştî meşê wê ji bo bicihanîna ‘pîvana hêviyê’ name ji Wezareta Edaletê, komîsyonên meclîsê û Serokatiya meclîsê re bêne şandin.
Hevseroka Şaxê Amedê ya Komeleya Hiqûqnasan a ji bo Azadiyê (OHD) Zeynep Karayilan têkildarî meşa 27’ê Sibatê ji ANF’ê re axivî.
‘BIRYARÊN DMME’YÊ DIVÊ BI CIH BÊNE ANÎN’
Zeynep Karayilan diyar kir ku biryara ‘mafê hêviyê’ ya Dadgeha Mafên Mirovan a Ewropayê (DMME) divê bi cih bê anîn ku têkildarî Rêber Apo wergirtiye û got, “Dadgeha Mafên Mirovan a Ewropayê di sala 2014’an de têkildarî Birêz Abdullah Ocalan biryara ‘mafê hêviyê’ da. Vê biryarê bi şênberî eşkere kir ku dewamkirina ragşrtina kesekî cezayê muebbetê yê girankirî lê hatiye birîn heta bi mirinê, êşkence ye.
Mecbûrî ye ku Tirkiye di vê mijarê de guhertinên qanûnî bike. Lê belê li gel deh salên di ser re derbas bûn ti gav nehat avêtin. Her wiha di plana çalakiyê de ya ku pêşkêşî Komîteya Wezîran a Konseya Ewropayê hate kirin, bi eşkere hate ragihandin ku wê guhertin neyê kirin.
Ji aliyê hiqûqa pozîtîf ve ev biryar ferz e ku bi cih bê anîn; bêyî dudiliyê divê bi cih bêne anîn. Azadiya fîzîkî ya Birêz Ocalan ku muzakerevanê sereke yê pirsgirêka Kurd e û afirandina mercên kar ên azad pêwîstiya esasî ya pêvajoyê ye.”
BANGA LI RÊXISTINÊN HIQÛQÊ
Zeynep Karayilan destnîşan kir ku weke OHD wê nerazîbûna xwe ya demokratîk bilind bikin û bang li rêxistinên hiqûqê hemûyan kir ku beşdarî meşa 27’ê Sibatê bibin. Zeynep Karayilan got, “Me heta niha gelek panel û konferans lidar xist, li komîsyona meclîsê ev heqîqet anî ziman. Niha jî weke hiqûqnasan em bi dirûşma ‘Bila biryara mafê hêviyê bi cih bê anîn’ li qadan e.
Di 27’ê Sibatê saet di 14:00 de meşa me wê ji ber Mizgefta Mezin destpê bike û li ber Edliyeya li Amedê bi dawî bibe. Piştre jî em ê nameyên xwe ji Wezareta Edaletê û Serokatiya Meclîsê re bişînin.
Em ji vê derê bang li baroyan û rêxistinên hiqûqê hemûyan dikin ku bikevin bin barê vê têkoşîna ji bo mafên mirovan. Divê neyê jibîrkirin ku mafê hêviyê mafekî gerdûnî ye, ne qencî ye.”
