Êzidiyên Şengal parastina xwe di parastina Rojava de dibînin. Ji ber vêya ji dema êrişên çeteyên Colanî li dijî Rojava destpê kirine heya niha biçalakiyên cûda cûda li serpiyane.
Endamê Akademiya Zanista Civakî ya Abdullah Ocalan Kendal Çiya derbarê sedemên êrişkirina li ser Rojavayê Kurdistanê, xeteriyên li ser Şengalê û tedbîrên pêwîst ji ANF’ê re axivî.
Kendal Çiya destpêkê berxwedêrên Rojavayê Kurdistanê û berxwedana gel silav kir û got: ‘‘Berxwedana gelê me yê Rojavayê Kurdistanê û gelê Kurd silav dikim. Bejna xwe li ber bîranîna şehîdên Helebê û berxwedana Rojava ditewînim.’’
‘RÊBER APO GELEK HEWL DA JI BO ŞER RÛ NEDE’
Kendal Çiya destpêkê bal kişand ser hewldanên Rêber Apo ya ji bo xwîn li Kurdistanê û herêmê nerije û got: ‘‘Rêber Apo hewl da, ked da û hişyariyên girîng kir ji bo gelên Rojhilata Navîn di komkujiyan re derbas nebin, dîsa hevalên me yên Rojava jî gelek hewldan ji bo şer rû nede. Lê tevî van hewldanan jî ev şer li ser gelê me hate ferzkirin. Weke Rêber Apo jî destnîşan kiriye, komployeke navnetewî li ser gelên herêmê û gelê Kurd heye. Lewma divê em bi ruh û bi can piştgiriya gelê xwe yê Rojavayê Kurdistanê bikin. Di rastiyê de ji piştgiriyê jî wêdetir, me di fermana 2014’an de dît, eger gelê Rojavayê Kurdistanê û hêzên parastinê yên Rojava neban wê civaka Êzidî li ser rûyê erdê nehatiba hiştin. Rojavayê Kurdistanê sedema hebûna me ye. Sedema hebûna civaka Êzidî ye. Ji ber vêya êrişa ku niha li ser Rojavayê Kurdistanê çêdibe, êrişeke li ser tevahî gelê Kurdistanê ye. Ev êrişeke qirkirinê ye û em weke êrişeke li ser hebûna xwe dibînin.’’
Kendal Çiya got, ‘‘Niha xeteriyeke mezin heye. Komên tundrew, cîhadîst û DAÎŞ’î bi şekil û şêwazeke cûda xwe rêxistin kirine û bûne belaya serê gelê Kurd û gelên hêrêmê. Li hember vê xeteriya mezin destpêkê dixwazim bang li civaka Êzidî, hemû pêkhate û kêm neteweyên Rojhilata Navîn, bi taybet jî yên Iraq û Sûriyeyê bikim, divê li hember ev çeteyên hov, li hember ev komploya navnetewî ya bêbext, yekîtiya xwe çêbikin, ji bo bikarin li hember ev êrişên hov bisekinin.’’
‘CIVAKA ME ÊDÎ RÊXISTINKIRÎ Û ZANA YE’
Kendal Çiya da zanîn xeterî li ser Şengalê jî heye û got: ‘‘Em dizanin niha li Şengalê jî xeterî heye. Lê civaka me ne weke dema sala 2014’an e, hişyar û zana bûye. Herkes di warê leşkerî de şehrezatiya xwe çêbûye. Ji ber vêya li hember îhtîmala derketina şerekî bang li gelê me yê Şengalê dikim ku yekîtiya xwe çêbikin, parastina xwe û rûmeta mirovahiyê bikin.’’
‘DEWLETÊN QIRKIRINA ÊZIDIYAN NASKIRINE DIVÊ BÊDENG NEMÎNIN’
Kendal Çiya bal kişand ser bêdengiya dewletên ku qirkirina Êzidiyan nas kirine û got: ‘‘Em hêzên komploger şermezar dikin. Ew dewletên qirkirina civaka Êzidî nas kirin, divê li hember van êrişên li ser Rojavayê Kurdistanê bêdeng nemînin. Ji ber Êzidî ji Helebê bigire heya Cizîrê hene û li wir tên qirkirin. Eger ev dewletên qirkirina Êzidiyan nas kirine ji dil û rast dibêjin, divê gelê me yê Êzidî û hemû Rojavayê Kurdistanê ji van êrişan biparêzin û bêdeng nemînin. Lê ya xuya dike, bi daxuyanî û îtîfaqên xwe piştgiriya vêya dikin. Gelê me ne gelekî bêrêxistin û nezane. Ev sedsale dixwazina gelê me qir bikin û bi vê êrişê jî dixwazin temam bikin. Parastina Rojavayê Kurdistanê parastina hebûn, rûmet û azadiya tevahî gelê Kurd e. Her wiha parastina hebûn û rûmeta civaka Êzidî ye. Civaka Êzidî di ferqa vê de ye. Divê gelê me ji bo Rojavayê Kurdistanê çi ji destê wê were bike. Di heman demê de bi her awayî tedbîrên xwe bigirin. Rojavayê Kurdistanê ne bi tenê ye, wê azadî ya gelê me be.’’
