Serokê Hikumeta Demkî ya Sûriyeyê Colanî yek ji kesên herî metirsîdar ê komên cîhadîst Huseyîn es Seleme kir serkêşê Servîsa Îstîxbaratê ya Giştî ku yekîneya ewlekariyê ya herî krîtîk a welêt e. Ev tayînkirin li asta neteweyî û navneteweyî bû sedema nerazîbûnên tund.
Rabirdûya Seleme ya li nava Eniya El Nûsra û Heyet Tehrîr El Şam (HTŞ) kir ku vê biryarê bike mijara nîqaşê.
Huseyîn es Seleme sala 1984’an li bejahiya Dêrazorê ji dayik bû, di ciwantiya xwe de bi bangên ji bo olî dihate naskirin. Bi şerê navxweyî yê Sûriyeyê re ku sala 2011’an destpê kir, tevlî nava refên cîhadîst ên tundrew bû.
‘Konseya Şûra ya Mucahîtên Wîlayeta Rojhilat’ ava kir û komên cîhadîst ên li herêmê gihand hev. Di nava Eniya El Nûsra de zû bilind bû û bû ‘Berpirsyarê Herêma Rojhilat’. Dema ku El Nûsra veguherî HTŞ’ê Seleme bi roleke aktîf rabû û di nava avaniya îdarî û leşkerî ya rêxistinê ya li Idlibê de wezîfeyên girîng kir. Demeke dirêj weke ‘Şefê Ewlekariyê yê Giştî’ di nava HTŞ’ê de kir. Bi taybetî dosyayên hesas ên rêxistinê di bin kontrola wî de bûn.
Wezareta Karên Derve ya DYE’yê têkildarî tayînkirinê daxuyaniyek da û got, “Eger rêveberekî payebilind ê berê yê rêxistineke terorê weke şefê îstîxbaratê bê tayînkirin, hingî samîmiyeta li Sûriyeyê ya têkoşîna li dijî terorê wê bi rengekî cidî bê lêpirsîn.”
Sûriyeyiyên ku di êrîşên giran ên HTŞ’ê de xizmên xwe winda kirin, nerazîbûneke tund nîşanî vê tayînkirinê dan. Sûriyeyiyan tayînkirina kesekî ewçend metirsîdar ê rêxistinê li ser yekîneya ewlekariyê, weke ‘xelatkirina kujeran’ pênase kirin.
Li gorî pisporan jî tayînkirin weke nîşaneya guhertineke radîkal a li ser meyla stratejîk a dewletê ye. Diyar dikin ku ev gav valahiya navbera gotin û kiryarên têkoşîna li dijî terorê hîn mezin kiriye. Tayînkirin weke mînakeke şênber a polîtîkaya hikumeta Colanî ya ji bo entegrekirina cîhadîstan li sîstemê tê nirxandin.
Tayînkirina Seleme weke şefê îstîxbaratê radixe pêş çavan ku lihevkirina civakî ya li Sûriyeyê tenê di gotinê de maye.
