Rêxistinên Elewiyan nerazîbûn nîşanî destûrnameya madenê dan, ku li navçeya Gumuşhacikoy a Amasyayê bi îlaheya 25’ê Adarê hate dayin. Saziyan daxuyaniyek weşandin û ragihandin ku qada destûra madenê jê re hatiye dayin ne tenê qadeke ji jiyana xwezayî ye, di heman demê de warekî pîroz ê baweriya Elewiyan e.
Di daxuyaniyê de hate gotin, gundên Îmîrler, Aşagikovak, Karaalî û Kiliçaslan û taxa Tekkeyê weke qada madenê hatiye ragihandin. Hate bibîrxistin ku li vê qadê tejaneyên avê, zeviyên çandiniyê, çêrgeh û cihên ziyaretê yên pîroz hene.
Li gorî daxuyaniyê, bi taybetî tirbên Niyaz Baba, Îmîr Dede û Koteklî Baba li qadê ne û çûyîna tirba Niyaz Baba ji ber karên madenê tê astengkirin.
Rêxistinên Elewiyan hişyarî dan ku karên madenê wê çavkaniyên avê gemarî bikin, xisareke welê li xwezayê û ekosîstemê bikin ku vegera jê nabe û çandinî, sewalkarî û mêşvaniya li herêmê ku çavkaniya debarê ye bi rengekî cidî zerarê bibînin.
Rêxistinan destnîşan kirin ku projeya navborî binpêkirina mafê jiyanê, azadiya baweriyê û hawirdorê ye û gotin, “Ji bo parastina qadên xwe yên jiyanê em ê bi her awayî têbikoşin.”
Saziyên Elewiyan ên ku mohra xwe danîn binê daxuyaniyê bi vî rengî ne: Federasyona Elewî Bektaşî, Federasyona Elewiyan a Tirkiyeyê, Konfederasyona Yekîtiyên Elewiyan a Ewropayê, Weqfa Çandê ya Anatoliyê ya Haci Bektaş Velî, Komeleyên Çandê yên Elewiyan û Komeleya Çandê ya Pîr Sûltan Abdal.
