Daxuyaniya Koordînasyona KJK’ê ya li ser malpera xwe ya înternetê weşand bi vî rengî ye:
“Em jinên têkoşer silav dikin ku bi deng, gotin, govend û tilîliyên xwe qad dagirtin, li dijî kiryarên barbar ên sîstema mêr li ber xwe didin, hesab ji sîstema mêr-dewletê ya zalim dipirsin. Em hemû jinên ku di pîrozbahiyên bi bandor ên Roja Jinên Kedkar ên Cîhanê ya 2024’an de ked dan, pîroz dikin.
Jinên ku di bin zexta zayendîperestiya civakî de 24 saetên rojê krîz, komkujî û zilmê dibînin, îsal di 8’ê Adarê de careke din bi wêrekî, bi biryardarî gotin ‘Ez heme’ û rastiya têkoşîneke radîkal afirandin. Jinan li ber polîtîkayên mêtingerî, qirkirin, destavêtin û destdirêjiyê rabûn ku li her qada jiyanê û di her kêliyê de têne ferzkirin. Jinan di hemû çalakiyan de bi dengekî bilind nerazîbûna xwe li dijî rêxistinî û mejiyê zayendîperest ê desthilatdarîparêz anîn ziman ku berpirsyar û sûcdarê kiryarên li dijî jinan e. Lewma 8’ê Adarê ya 2024’an bû nîşaneya şênber a hişyarbûna jinê, têgihiştin, îradebûn û rêxistiniyê. Têkoşîna jinê îro bûye têkoşîna mafên mirovan û demokrasiyê ya herî radîkal.
Destketiyên ku bi têkoşîna jinê hatin afirandin bi Şoreşa Jinê ya Rojava re gihîşt asteke bilind. Me 8’ê Adarê ya îsal bi biryardariya wê yekê pêşwazî kir ku Şoreşa Jinê bikin malê jinên Rojhilata Navîn û cîhanê. Şerê ku bi destê faşîzma mêr-dewletê têne destpêkirin herî zêde bandorê li me jinan, zarokan, gelan û xwezayê dike. Ji ber vê yekê jî li dijî krîz, şer, hilweşîn, koçberî, nijadperestî, neteweperestî û zayendîperestiya faşîzma dewlet a mêr a serwer, weke jin divê em ne tenê rojeke salê, lê di her kêliyê de ji bo jiyaneke ekolojîk, azad û demokratîk di nava rêxistinî û têkoşînê de bin. Sala 2024’an ku şerê aborî, siyasî, çandî û leşkerî bandoreke hilweşîner li ser jin, gelan û xwezayê kirin, ji aliyê têkoşîna jinê ve jî salake girîng e. Rastiya 8’ê Adarê bû nîşaneya asta herî bilind a vê yekê. Di vê kêliya krîtîk a dîrokê de yekane rêya rawestandina serdema barbariya modern ew e ku li ser felsefeya Jin, Jiyan, Azadî Şoreşa Jinê bê birêxistinkirin. Li dijî sîstema mêr ku kêlî bi kêlî şer, mêtingerî, nijadperestî, zayendîperestiyê hildiberîne û zêde dike, di şexsê jinê de jiyanê qetil dike, divê em hêza xwe ya hişmendî û têkoşînê bilind bikin û bi vî rengî bimeşin. Veger êdî ji têkoşîna jinê nabe. Lewma divê hîn bêhtir bê birêxistinkirin, xeta têkoşîna hevpar bê afirandin û bi vî rengî em ê karibin sîstema zordar a ku dema wê qediya ye têk bibin.
Dem dema mezinkirina têkoşînê ye, dema gerdûnî û hevparkirina têkoşînê ye. Dem dema avakirina Şoreşa Jinê li ser bingeha felsefeya Jin, Jiyan, Azadî ye. Weke KJK’ê bi coş û bedewiya Şoreşa Jinê em jinên ku 8’ê Adarê bi wate kirin careke din silav dikin.
Ji bo serketina têkoşîna maf, edalet, wekhevî, azadî û demokrasiyê em soza xwe dubare dikin ku her rojê bikin 8’ê Adarê.”
