Partiya Kedê di civîna li Lokala Cemiyeta Rojnamevanên Başûrêrojhilat (GGC) de, encamnameya “li dijî rejîma qesrê ji bo ked, aştî û azadiyê banga yekîtî û têkoşînê” ji raya giştî re ragihand. Serokê Giştî Seyît Aslan û gelek rojnamevan tevlî civînê bûn.
Aslan di civînê de axivî û diyar kir ku Tirkiye di bin rêveberiya yek zilam de “ber bi siberojeke tarî ve tê dehfdan” û got, bernameya aborî û pêkanînên siyasî jiyan ji bo karker û hemû beşên gel zehmet kiriye.
Aslan destnîşan kir ku li Kulpê 4 karkeran jiyana xwe ji dest dan, di doza Somayê de jî “bêcezatî” didome û got, “Sermaye dewlemend dibe, kedkar dimirin.”
Aslan diyar kir ku tayînkirina qeyim a li şaredarî û muxtariyan didome û got, desthilatdarî li Rojhilata Navîn hevkariya xwe ya bi emperyalîstan re kûr kiriye.
EGER PÊVAJO PÊŞ BIKEVE, DEWLET DIVÊ GAV BAVÊJE
Aslan bal kişand ser nîqaşên piştî merheba dayîna Bahçelî ya bi parlamenterên DEM Partiyê re destpê kirî û ragihand ku tevgera siyasî ya Kurd gelek gavên girîng avêtin, lê belê desthilatdariyê ti gav neavêtiye û helwesteke hîn tundtir raber dike.
Aslan anî ziman ku siyasetmedarên girtî divê bên berdan û destnîşan kir ku li Sûriyeyê destkeftiyên gelê Kurd hedef tên girtin.
Aslan diyar kir ku ji bo pêvajo pêş ve biçe divê tecrîda Îmraliyê were rakirin û ev tişt bilêv kir: “Divê şert û mercên Abdullah Ocalan demildest bên sererastkirin. Komîsyon jî divê demildest bi Abdullah Ocalan re hevdîtinê bike. Divê netewa Kurd li ser bingehê mafên wekhev were naskirin.”
Civîn bi bersivdayîna pirsên çapemeniyê, bi dawî bû.
