Konfederasyona Civakên Kurdistaniyên li Ewropayê (KON-MED) bi tundî rexne li Parlamenterê Meclîsa Federal a Yekîtiya Demokratîk a Hrîstiyan (CDU) Tijen Ataoglu yên derbarê girtîbûna Rêber Apo kir û ji Koma Meclîsê CDU/CSU û hikûmeta Elman xwest ku helwesta xwe ya derbarê mijarê de rabigihînin.
Tijen Ataoglu 15’ê Cotmehê di rûnîştinekî li ser têkiliyên Elmanya-Tirkiye ya li Meclîsa Federal de wiha gotibû, “Cihê Abdullah Ocalan girtîgeh e û ev rast e.”
KON-MED’ê bi daxuyaniyekî nivîskî diyar kir ku gotinên Ataoglu nayê qebûlkirin û destnîşan kir ku ev nêzîkatî aliyê mafên mirovan a girtina Rêber Apo û biryarên Dadgeha Mafên Mirovan a Ewropayê (DMME) ji nedîtî ve tê.
KON-MED’ê destnîşan kir ku Ataoglu di heman demê de endamê Komîteya Karûbarên Hiqîqû û Mafên Mirovan a Meclîsa Parlamentera a Konseya Ewropayê ye û wiha got, “Em ji hiqûqnasekî di vê pozîsyonê de bendewarî dikin ku li şûna girtina kesekî bêyî şert û merc mafdar nîşan bide, biryarên mafên mirovan a Ewropayê cidî bigre.”
KON-MED’ê di daxuyaniya xwe de biryara ku DMME’yê di 18’ê Adara 2014’an de ji bo Rêber Apo da bi bîr xist.
KON-MED’ê destnîşan kir ku daxuyaniyên Ataoglu di demeke krîtîk a Pêvajoya Aştî û Civaka Demokratîk de hatiye kirin. Her wiha diyar kir ku daxuyaniyên ku domandina girtina Rêber Apo bêyî şert û merc diparêzin, di aliyê siyasî de xwedî peyamekî xeter e û got ku nêzîkatiyên bi vî rengî lêgerînên çareseriyê yên bi rêya muzakereyê lewaz dike.
KON-MED’ê daxuyaniya Wezareta Karên Derve ya Elmanyayê ya di 27’ê Sibata 2025’an de li ser banga aştiyê ya Rêber Apo jî bi bîr xist.
Wezareta Karên Derve ya Elmanyayê banga navborî ji bo bidawîkirina pevçûna ku bi salan in dewam dike, wekî firsendekî dîrokî nirxandibû û ragihandibû ku Elmanya amade ye ku piştgirî bide çareseriya siyasî.
KON-MED’ê ji Koma Meclîsê ya Federal CDU/CSU û hikûmeta Elman xwest ku helwesta xwe ya derbarê mijarê de rabigihînin.
Her wiha bang kir ku di asta Ewropayê de gavên şênber bên avêtin.
KON-MED’ê hem ji hikûmeta Elman hem jî ji şandeya Elman a li Meclîsa Parlamenteran a Konseya Ewropayê xwest ku ji bo pêkanîna biryarên DMME’yê helwestekî bi biryar raber bikin.
KON-MED’ê daxuyaniya xwe bi van gotinan bi dawî kir: “Mafê hêviyê ne tawîzekî siyasî ye, mafekî mirovî ye. Ev maf ji bo Abdullah Ocalan jî derbasdar e.”
