Nivîskar, rojnamevan û çavdêrê siyasî Latîf Fatîh Ferec roportaj da ANF’ê û bal kişand ser girîngiya yekîtiya neteweyî ya gelê Kurd. Ferec destnîşan kir ku di qonaxa niha de Kurd divê parçeyên Kurdistanê nêzî hev bikin.
‘YEKÎTIYA NETEWEYÎ XEYAL Û ARMANCA HER KURDEKÎ YE’
Latîf Fatîh Ferec diyar kir ku piştî parçebûna demdirêj a Kurdistanê, yekîtiya neteweyî bûye yek ji xeyal û armancên herî esas. Ferec got, “Derbaskirina vê qonaxê tenê bi avakirina formekî siyasî na, bi fêmkirina êşên hevdû pêkan e.”
Nivîskar destnîşan kir ku gelê Kurd divê li çar parçeyên Kurdistanê ji hevdû agahdar bin û got, “Ev yekîtiya Kurdistanê, di meşên piştgiriya ji bo berxwedana Rojava de hate dîtin.”
Ferec dîroka şerên navxweyî bi zimanekî tund rexne kir û diyar kir ku ev rewşa 60-70 salên dawî zirarên mezin daye civaka Kurd. Ferec got, “Divê ev dem êdî li paş bê hiştin û her kes li ser bingehê hevkarî û alîkarî dayîna hev, tevbigere.”
Nivîskar bang li saziyên civakî û perwerdeyê kir ku ji bo xurtkirina zanebûna neteweyî û bilindkirina ruhê yekîtiyê, bi rola xwe rabin.
‘DIVÊ EM JI TECRÛBEYÊN BI ÊŞ YEKÎTIYÊ FÊR BIBIN’
Ferec diyar kir ku Kurd ji bo nexşerêyeke siberojê çêbikin, divê bibin xwedî navendên lêkolînê da ku li ser rewşa heyî û dîrokê nirxandinan bikin. Destnîşan kir ku hêzên siyasî divê tevî cudahiyan jî hevdû weke dijmin nebinin û hesta welatparêziyê kûr bikin.
Latîf Fatîh Ferec axaftina xwe bi van gotinan temam kir: “Êşên mîna Enfal û Helebceyê ji bo avakirina siberoja hevpar û bi ewle ya gelê Kurd, çavkaniya fêmkirina girîngiya yekîtiya neteweyî ye.”
