Serokê Duyemîn ê Federasyona Elewiyên Ereb a Ewropayê Hasan Gokyildiz anî ziman ku li hemberî civaka Elewî ya li Sûriyeyê bûyerên komkujî, zext, sirgûna ji neçarî û revandinê zêde bûn û got, ewlehiya jiyanê ya Elewiyan bi rengekî cidî ketiye nava xeteriyê. Gokyildiz destnîşan kir ku bûyerên diqewimin parçeyek ji polîtîkaya şikandinê ya bi rêk û pêk e.
Serokê Duyemîn ê Federasyona Elewiyên Ereb a Ewropayê Hasan Gokyildiz ragihand ku zextên li hemberî civaka Elewî ya li Sûriyeyê di astên cuda de dewam dikin. Gokyildiz diyar kir ku kiryarên bi destê hikumeta navendî ya Şamê ya veguhêz tê meşandin veguheriye polîtîkayeke tasfiyeyê.
Gokyildiz destnîşan kir ku zextên li ser Elewiyan ne tenê komkujî û girtin e û got, “Li daîreyên delwetê Elewî ji kar têne derxistin û ev yek demeke dirêj e dewam dike. Van deveran ji Elewiyan paqij dikin. Gihîştiye wê astê ku nema dikare bê veşartin. Li hin deveran yekser ji kar derdixîne, li hin deveran jî karmend li deverên welê têne tayînkirin ku gelekî dûrî cihê jiyana wan e. Bi vî rengî mirov di pratîkê de bêkar têne hiştin. Rewşa aboriyê ya mirovan li holê ye. Bi vî rengî siyaseteke cidî ya zextê di dewrê de ye.”
Gokyildiz anî ziman ku li herêmên piraniya şêniyên wan Elewî ne bûyerên revandinê zêde bûne û diyar kir ku mirov dema diçin kar jî ewlehiya jiyana wan nîne. Gokyildiz got, di rewşa heyî de mirov nikare qala welatekî ewle bikin.
ELEWÎ KETIN NAVA PÊVAJOYA TÊKOŞÎNÊ
Gokyildiz ragihand ku civaka Elewî li hemberî zextan ketine nava pêvajoyeke têkoşînê û axaftina xwe bi vî rengî dewam kir; “Dema dawî Konseya Sûriyeyê ya Rojava Navîn ava bû. Ev avaniya ku ji aliyê Elewiyan ve hate avakirin ji aliyê Şêx Gazal ve tê meşandin. Êdî ji ber ewlehiya jiyanê ew bi xwe jî zêde nayê dîtin. Bi giranî il ser medya dîjîtal bangan dike. Demekê ji bo xwepêşandaneke aştiyane ya du rojan bang kir û piştre jî biryara grevê ya pênc rojan hate dayin. Gel dikan venekir, neçû kar, zarok neçûn dibistanan. Lê belê hêzên çekdar ên Colanî gef li mirovan xwar, hewl dan bi zorê dikanan bidin vekirin, derî û camên dikanan şikandin. Serdegirtin li malan kirin. Bi rengekî eşkere polîtîkaya şikandinê hate meşandin. Armanc bêdengkirina gel e ku serî li ber Ahmed Şara bitewîne.”
Gokyildiz ragihand ku piştî komkujiyê di nava Elewiyan de li qadê tevgereke bi rêxistin destpê kiriye û ev yek bêçek jî be pêvajoyeke berxwedanê ya girseyî derketiye holê. Gokyildiz got, “Elewî êdî li ber vê rewşê radibin û liv û tevgerek heye. Berê nerazîbûn hebû, lê belê mirov newêrî bûn. Lê belê piştî xwepêşandanên doh hate dîtin ku bi çek nebe jî di nava Elewiyan de serhildanekê destpê kiriye. Hêzeke çekdar nîne ku gel biparêze. Gel di bin zextê de ye. Ewlehiya jiyana xwe nîne. Xizanî di asta herî bilind de ye, mirov di bin sînorê birçîbûnê de ne. Rêxistinên Elewî li gorî derfetên xwe kampanyayên alîkariyê dimeşînin. Lê belê gel êdî bêzar bûye. Hatiye wê astê ku bibêje, ‘Ya em ê bimirin, ya jî em ê li ber xwe bidin’. Wê rojê me ev dî: Mirovan mirin dan ber çavên xwe û daketin qadan. Li herêmên Elewiyan û li bajarên mezin her kes daketin qadan. Li hin deveran hêzên çekdar ên Colanî bi şûr û kêran êrişî gel kirin, hinek mirov kuştin. Ji ber ku rêxistinên Elewî bi hev re tevgeriyan gel li ber xwe da. Rêxistinên Elewî yên li Tirkiye û Ewropayê di cih û dema xwe de nerazîbûn nîşan dan. Em dibînin ku ev yek ji bo Elewiyên li Sûriyeyê bûye wêrekî û moralê. Qet nebe zanin ku piştgiriyeke wan heye ku li nava raya giştî ya navneteweyî dikarin dengê xwe bidin bihîstin.”
‘MECBÛRE KU BERSIVÊ BIDE DAXWAZA RÊVEBERIYA XWESER Û FEDERAL’
Gokyildiz destnîşan kir ku têkoşîna civaka Elewî wê bi rengekî rêxistinbûyî dewam bike û diyar kir ku mijara ewlehiya jiyanê ya Elewiyan ketiye rojeva raya giştî ya navneteweyî.
Gokyildiz anî ziman ku hêzên li herêmê aktor in bêyî ku Elewiyan nedin ber çavan nikarin siyasetê bikin û axaftina xwe bi vî rengî qedand: “Herî kêm meseleya ewlehiya jiyanê ya Elewiyan bala raya giştî ya navneteweyî kişandiye û dikeve rojevê. Elewî herêmeke otonom, federal dixwazin. Wê daxwaza xwe ya ku dibêjin, ‘Em êdî naxwazin mecbûr bimînin ku di bin rêveberiya vê hikumetê de bimînin’ wê bi dengekî hîn bilind bînin ziman. Ji ber ku bi guhertina rejîmê re bûn hedefa komên radîkal û komkujî li wan hate kirin Li herêmên Rojava û Durziyan dewletên weke Emerîka û Îsraîl hene. Ev yek hevsengiyek e, lê belê li herêmên civaka Elewî ti hêzeke navneteweyî nîne. Elewî wê bi piştevaniya gelan têkoşîna xwe dewam bikin. Ne çekên wan hene ne jî hêza xwe ya aborî; tenê baweriya wan heye. Ji ber ku heta niha timî hatin kuştin, hatin eciqandin. Li qadê li pêş çavan komkujî heye. Armanc ew e ku gel timî di bin zextê de bihêle û komkujî dewam dike. Serîtewandin li gel tê ferzkirin.”
