Çalakiyên 25`ê Mijdarê Roja Têkoşînê ya Navneteweyî ya li dijî Tundiya li Jinê ku ji hêla Platforma Çalakiyên Hevbeş a Tevger û Rêxistinên Jinan a Rojava ve li bajarên herêma Cizîrê tên birêxistinkirin, didomin.
GIRKÊ LEGÊ
Kongra Star a bajarê Girkê Legê bi beşdariya endamên saziyan û şêniyan meşek li dar xist.
Meşê ji Qada Şehîd Xebat dest pê kir û li kolanên sereke yên bajêr geriya. Li sûka bajêr piştî deqeyeke rêzgirtinê hevseroka Partiya Yekitiya Demokratîk (PYD) a Herêma Cizîrê Eyhan Murad axivî û da zanîn ku tundiya li dijî jinan îrade, kesayet û mafê wê hedef digire, rejîmên desthildar hewl didin jinan bê maf û îrade bihêlin û rê li ber pêkanîna rola wan bigirin.
Eyhanê diyar kir ku mafê jinan ji bo avakirina civakeke demokratîk, exlaqî û adilane esas e, azadiya civak û welat bêyî azadiya jinan pêk nayê.
Meş bi berzkirina sloganên “Jin, Jiyan, Azadî” bi dawî bû.
TIRBESPIYÊ
Kongra Star a bajarê Tirbespiyê meşek li dar xist, meşê ji pêşiya Avahiya Perwerdeyê dest pê kir û li Qada Azadî bi dawî bû.
Meşvanan wêneyên şehîdên Komkujiya Parîsê rakirin û sloganên “Jin, Jiyan, Azadî” berz kirin.
Di mîtînga piştî meşê de endama Kongra Star Munteha Mehmûd axivî û da zanîn ku tundiya li dijî jinan bi her awayî berdewam dike.
Muntehayê destnîşan kir ku divê li hemberî tundiya li ser jinan hemû jin derkevin û bê deng nemînin û got: “Divê hemû jin daxwaza mafê xwe yê destûrî bikin.”
Di dawiyê de endama Kongra Star Munteha Mehmûd got: “Divê di avakirina Sûriyeyê de, jin cihê xwe bigirin, jin dikarin di her alî pêşengiyê bikin û ev yek di Şoreşa Rojava de hat xuyakirin.”
QAMIŞLO
Li bajarê Qamişlo Meclisa Jinan a PYD`ê bi beşdariya endamên PYD`ê û bi armanca pêşxistina hişmendiya mafên jinan û redkirina hemû cureyên tundiyê, semînerek organîze kir.
Di semînerê de endama Kongra Star Zêrîn Derbas behsa rewşa jinan û tundiya li dijî wê ji dîrokê heta roja îro kir, bal kişand ser têkoşîna jinan a ji bo bidestxistina maf û tesbîtkirina rola wê ya di navendên biryardarî û rêveberiyê de.
Zêrîn Derbas destnîşan kir pêşxistina jinan di xebatê de û pêkanîna serxwebûna wê ya madî û xwebûnî girîng e, divê wekheviya di navbera her du zayenda de di milê hiqûqî, derfetdayîn û berpirsyartiyê de pêk were.
Di dawiya semînerê de Zêrîn Derbas da zanîn ku têkoşîna li hember tundî û cudakariyê, misogerkirina azadiya jinan û beşdariya wan a aktîf, temsîla bingeha esasî ya avakirina civakeke adilane û wekhev dike.
DIRBÊSIYÊ
Li bajarê Dirbêsiyê Kongra Star ji bo 25’ê Mijdarê Roja Têkoşîna li dijî Tundiya li ser Jinan meş organîze kir.
Meşê ji Çerxerêya Jinê dest pê kir û heyanî Çerxerêya Şaredariyê dewam kir. Di meşê de pankartên “Ji bo bidawîanîna tundiya li dijî jinan bibin yek, Jin, Jiyan, Azadî” berz kiribûn. Her wiha dirûşma “Jin, Jiyan, Azadî” berz kirin.
Piştî deqeyeke rêzgirtinê şaredarê bajêr Silêman Xelîl axivî û got: “Jinan pêşengî ji Şoreşa Rojava re kir û rolê wan xurt bû. Heyanî jin azad nebe civak azad nabe. Hişmendiya mêr ne tenê desthilatdariyê li ser jinan dike, her wiha koledar desthilatiyê li mêran jî dike. Divê her kes ji vê zîhniyetê rizgar bibe û jin û mêr wekhev bijîn.”
TIL TEMIR
Kongra Star îro li bajarê Til Temirê bi beşdariya şêniyên bajarokê Zirganê, bi boneya 25`ê Mijdarê Roja Têkoşîna li dijî Tundiya li ser Jinan meşeke girseyî li dar xist.
Meşê ji pêşiya Navenda Meclisa Malbatên Şehîdan a Til Temirê dest pê kir û di kolanên sereke yên bajêr re derbas bû û li ser Rêya M4`ê veguherî mîtîngeke girseyî.
Di mîtîngê de, rêvebera Kongra Star a Til Temirê Ronaz Yûnis diyar kir ku têkoşîna li dijî tundiya li ser jinan ne tenê bi çalakiyek salane ve sînordar e, lê têkoşîneke berdewam e.
Ronazê behsa ezmûna jinên li Rojava kir û diyar kir û got: “Şoreşa ku di sala 2012’an de dest pê kir, rê da jinan ku beşdarî biryardanê bibin, saziyan bi rê ve bibin û di warên siyasî, civakî, aborî, parastin û dadwerî de bixebitin.”
Ronazê her wiha behsa rola Yekîneyên Parastina Jin (YPJ) di şerê li dijî DAIŞ`ê û parastina civakê de kir û banga xurtkirina rêxistinên jinan, hevgirtin û çalakiyên hevbeş ji bo têkoşîna li dijî tundiyê û parastina destkeftiyên jinan kir.

