Çalakiyên Komeleya Mafên Mirovan (ÎHD) û xizmên windayan a bi daxwaza “Bila winda bên dîtin, kiryar bên darizandin” li Amed, Êlih û Colemêrgê berdewam kirin.
AMED
Xizmên Windayan û Komeleya Mafên Mirovan (ÎHD) a Şaxa Amedê di hefteya 847’emîn de çalakiya “Bila winda bên dîtin û faîl bên darizandin” li dar xist. Çalakî li ber Bîrdariya Mafên Mirovan a li Parka Koşuyolû ya Amedê pêk hat. Di çalakiyê de endam û rêveberên ÎHD, Dayikên Aştiyê, nûner û rêveberên saziyên sivîl, partiyên siyasî û gelek kes tevlî bûn. Beşdaran wêneyên windayan hildan û her wiha wêneyên windayan li erdê hatin raxistin. Di hefteya 847’emîn de li aqûbeta winda Omer Sogut hat pirsîn.
Beriya daxuyanî bê xwendin, Sekreterê ÎHD’ê ya Amedê Omer Saman axivî û bal kişand ser nedîtina windayan. Omer Saman her wiha bal kişand ser rewşa girtiyên nexweş ên li girtîgehan û xwest girtiyên nexweş demildest bên berdan.
Aktîvîstê mafê mirovan Firat Mercan jî metna serpêhatiya windakirina Omer Sogut xwend û bi bîr xist ku tevî hemû serlêdanan jî ev 30 sal in edalet bi cih nehatiye.
Piştre ji bo bîranîna Omer Sogût û hemû windayan çalakiya rûniştinê hat lidarxistin û çalakiya vê hefteyê bi dawî bû.
ÊLIH
Li Êlihê jî ÎHD û xizmên windayan di hefteya 683’yemîn de li ber Abîdeya Mafên Mirovan a li Kolana Gulistanê hatin cem hev. Di çalakiya ku pankarta bi nivîsa “Bila winda bên dîtin, kiryar bên darizandin” hat vekirin, gelek kes amade bûn. Vê hefteyê aqûbeta Ahmet Tekîn ê ku di Gulana 1994’an de li navçeya Licê ya Amedê di kontrola rê de ji aliyê leşkerên Fermandariya Cendirmeyan a Navçeyê ve hat binçavkirin û careke din agahî jê nehat girtin, hat pirsîn. Çîroka Tekîn ji aliyê Rêveberê Şaxa ÎHD’ê ya Êlihê Huseyîn Elçî ve hat xwendin.
Birayê Tekîn Bedrî Tekîn jî diyar kir ku hemû hewldanên wan bê encam mane, lê ew ê heta pêkanîna edaletê dev ji têkoşînê bernedin.
Çalakî, bi çalakiya rûniştinê bi dawî bû.
COLEMÊRG
Şaxa ÎHD’ê ya Colemêrgê û xizmên windayan di hefteya 173’yan de li ser Kolana Hunerê ya navçeya Geverê hatin cem hev. Gelek kes tevlî çalakiyê bûn û wêneyên windayan hilgirtin. Di çalakiya vê hefteyê de, ji bo Sertîp Şen ê ku di 2’ê Gulana 2019’an de li gundê Hirmîn ê Geverê dema pezê xwe diçêrand, di encama gulebarana ji qada leşkerî ve hat qetilkirin, hatin cem hev. Serpêhatiya Sertîp Şen hat vegotin û banga darizandina kiryaran hat kirin.
