Tora Aştiyê ya Rexneyî li Amedê bi tevlîbûna 50 rêxistin3en sivîl ‘Komxebata Aştiyê ya Amedê’ lidar xist. Komxebat li avahiya Odeya Bazar û Sanayiyê ya Amedê (DTSO) hate lidarxistin. Ji sekreteryeya torê akademisyen Ferda Fahrîoglû axaftina vekirinê kir.
Ferda Fahrîoglû diyar kir ku ew bi 50 rêxistinên ku têkoşîna aştiyê dimeşînin re hatine ba hev û got, “Di vê aştiyê de ne tenê dewlet, me xwest ku her kes di nava vî karî de be. Ji bo aştiya bi hev re, me xwest bixebitin.” Ferda Fahrîoglû destnîşan kir ku divê civaka sivîl di pêvajoya aştiyê de aktîf bi rola xwe rabe û got, “Divê em her gava aştiyê bi hev re bavêjin, divê her kes di van gavan de cih bigire.”
Ferda Fahrîoglû di axaftina xwe de bal kişand ser pêvajoya avakirina Tora Aştiyê ya Rexneyî û bi bîr xist ku pirsgirêka Kurd salên dirêj weke pirsgirêka “terorê” hate nirxandin. Ferda Fahrîoglû got, di Tîrmeha 2024’an de hîna pêvajoya aştiyê ne di rojevê de bû, 15 sazî hatin ba hev û tor hate avakirin.
Ferda Fahrîoglû ragihand ku ji ber pirsgirêka Kurd zêdeyî 50 hezar caran maf hatin binpêkirin û herî kêm nêzî milyonek kes bi rengekî travmatîk ji vê pêvajoyê bandor bûn û got, divê teqez rêxistinên civakî yên sivîl û kesên rasterast ji pêvajoyê bandor bûne, di komîsyonên jêr ên Komîsyona li Meclîsê de cih bigirin.
Ferda Fahrîoglû bal kişand ser girîngiya merasîma berdana çekan û ev tişt got: “Divê ji bo avakirina aştiyê, nêzîkatiyeke berfireh a ku hemû beşan temsîl dike, were raberkirin.”
Komxebat piştî axaftina vekirinê, bi rûniştinên ji çapemeniyê re girtî dewam kir.
