Jin bi dirûşma “Em bi berxwedanê azad dibin, civaka demokratîk ava dikin” li ber avaniya navçeyê ya DBP’ê li hev kom bûn û heta Parka Nûjiyan meşiyan.
Jinên ku kincên gelêrî li xwe kiribûn tim û tim dirûşmên “Jin, Jiyan, Azadî” û “Bijî berxwedana Jinan” qîriyan.
Li dû meşê daxuyaniyek hate dayin, qala dîroka 8’ê Adarê hate kirin û hate ragihandin ku têkoşîna wan li dijî sîstema bi serweriya mêr e. Daxuyanî bi Kurmancî ji aliyê endama TJA’yê Arzû Kahraman ve hate dayin.
Di daxuyaniyê de hate gotin, “Ruhê 8’ê Adarê li dijî talankirina kedê, li dijî tundî û qirkirina jinê navê berxwedanê ye.”
Her wiha silav ji girtiyên jin re hate şandin û hate ragihandin ku weke berê îro jî têkoşîna jinan dewam dike.
Di daxuyaniyê de işaret bi têkoşîna jinan a li Rojava hate kirin û hate gotin, “Şoreşa jinê ya li Rojava şênber bû, ronahiya hêviyê ya sedsala 21’ê ye.”
Di daxuyaniyê de hate gotin, “Li hemberî polîtîkayên tecrîdê, darbeya qeyûm, koletiya li nava malê, li dijî şer û talanê em bi biryar in ku jiyaneke demokratîk li dora jinê ava bikin.”
Bi dewamî hate gotin, “Em ji vê bawer in: Jin azad nebe civak azad nabe. Di 8’ê Adarê de armanca me ne tenê lidarxistina çalakiyan e; em dixwazin van çalakiyan veguherînin destketiyên mayinde, rêxistiniyeke bê navber û weke ku Birêz Ocalan işaret pê kir, em dixwazin civaka demokratîk û aştiyê ava bikin. Jinên ku felsefeya rizgariyê pejirandine, jinên rêxistinbûyî tenê dikarin azad bibin. Êriş çiqasî bi rêk û pêk jî bin, berxwedana me bi qasî wan rêxistinbûyî ye. Em ê faşîzmê û tarîtiya baviksalariyê bi piştevaniya jinê û hêza têkoşînê ya şoreşger hilweşînin.”
