Li Elmanyayê bi hezaran jin bi boneya 8’ê Adarê Roja Jinên Kedkar ên Cîhanê daketin qadan. Jinên Kurd bi cil û bergên xwe yên neteweyî yên bi reng beşdarî pîrozbahiyan bûn û dirûşmeyên “Jin, Jiyan, Azadi” ve “Bijî Serok Apo” qiriyan. Beşdaran îşaret bi têkoşîna jinan kirin û ji bo wekhevî û azadîxwaziya jinê banga mezinkirina piştevaniyê kirin.
HANNOVER
Li bajarê Hannover ê Elmanyayê bi boneya 8’ê Adarê Roja Jinên Kedkar ên Cîhanê çalakî hate lidarxistin. Jinên Kurd bi cil û bergên xwe yên neteweyî li kolanên bajêr bûn nîşaneya têkoşîna azadî û wekheviyê. Di çalakiyê de timî dirûşmeyên “Bijî Serok Apo” û “Jin Jiyan Azadî” hatin berzkirin.
Di çalakiyê de danezana TJK-E’yê hate xwendin û wiha hate gotin: “Peyama Rêber Apo ya 8’ê Adarê wekî nîşaneya vê têkoşîna mezin di dilê me de deng veda. Me careke din anî bîra xwe ku têkoşîna ku ji bo azadî, wekhevî û mafê jiyanê tê dayîn, çiqas girîng e. Ji ber ku dirûşmeya “Jin, Jiyan, Azadî” ne tenê dirûşmeyek e, awayê jiyanê ku mafê her jinên li cîhanê ye û banga şoreşgerî ye. Kolanên Hannoverê îro ronahîtir bû, ji ber ku bi rêwîtî û têkoşîna azadiyê ya jinan re li vê bajarê ronahiyek din pê ket. Ev meş ne tenê ya 8’ê Adarê nîşaneya berxwedan û piştevaniya bi salan e.”
DARMSTADT
Li bajarê Darmstadtê jî bi boneya 8’ê Adarê Roja Jinên Kedkar ên Cîhanê meşekî girseyî hate lidarxistin. Ji xeynî sazî û rêxistinên cuda, Meclîsa Roza a TJK-E Darmstadê jî bi rengê xwe beşdarî meşê bû. Di dema meşê de daxwazên mafên jinan, wekhevî û azadiyê hatin kirin û ji aliyê TJK-E’yê ve danezana têkildarî 8’ê Adarê hate xwendin. Beşdaran bal kişandin ser têkoşîna jinan û ji bo wekhevî û azadîxwaziya jinê banga mezinkirina piştevaniyê kirin.
FREIBURG
Li Freiburgê Meclîsa Jinê ya Nuda jî di nav de bi pêşengiya 8 rêxistinên jinan de jin daketin qadan. Meş li navenda bajerê Freiburgê hate kirin û pankarta gotina Rêberê Gelê Kurd Abdullah Ocalan a “Roja me, bi avakirina civaka demokratik û aşitîxwaz bilind dibe” hate hilgirtin. Di axaftinên çalakiyê de hate destnîşankirin ku azadiya jinê bingeha azadiya civakê ye. Her wiha hate destnîşankirin ku fikrên ku Rêber Apo têkildarî azadîxwaziya jinê bi salan in tîne ser ziman, îro hem li Kurdistanê hem jî li cîhanê deng vedaye.
Di daxuyaniya çalakiyê de hate diyarkirin ku têkoşîna jinê guhertinekî bi kok neçar kiriye û ev guhertin bi tenê têkoşîna rêxistinkirî re pêkan dibe. Her wiha hate destnîşankirin ku azadiya jinan ne tenê ji bo jinan di heman demê de ji bo demokratîbûna tevahiya cîhanê krîtîk e. Rêxistinên jinên Kurd ên Elmanyayê ragihandin ku wê ev çalakî dewam bikin û ew ê ji bo mezinkirina têkoşîna azadiya jinê zêdetir birêxistin bibin.
TRIER
Li bajarê Trier ê Elmanyayê bi boneya 8’ê Adarê Roja Jinên Kedkar ên Cîhanê bi pêşengiya Meclîsa Jinê ya Şêrîn Emelhûlî meş û mitîng hate lidarxistin. Çalakî li Qada Hauptmarkt ê navenda bajêr hate lidarxistin û îşaret bi mafên jinan û têkoşîna azadiyê hate kirin.
Beşdaran bi dirûşmeyên “Jin, Jiyan, Azadî” meşiyan û li dijî tundiya li ser jinê, newekhevî û zextan dengê xwe bilind kirin. Di axaftinên çalakiyê de îşaret bi binpêkirinên mafan ên ku jin li seranserê cîhanê rûbirû dimînin hate kirin. Her wiha îşaret bi girîngiya piştevanî û birêxistinbûnê hate kirin.
DUSSELDORF
Bi hezaran jin di çarçoveya 8’ê Adarê Roja Jinên Kedkar ên Cîhanê de li ber stasyona trenê ya Dusseldorf ê Elmanyayê kom bûn. Jinên ku di destên wan alên binefşî û pankartên rêxistinên jinên Kurd hatin qadê, bi cil û bergên xwe yên Kurdî coşeke mezin afirandin. Li qadê bi erbane, zurne û defê govendên gerandin.
Çalakiya 8’ê Adarê bi deqeyek rêzgirtina ji bo şehîdên Kurdistanê destpê kir. Peyama Rêber Apo ya 8’ê Adarê bi zimanên Elmanî û Kurdî hate xwendin. Dema ku peyama Rêber Apo hate xwendin bi hezaran dirûşma “Bijî Serok Apo” berz kirin. Hevseroka FED MED NRW’ê Şevîn Sîncar di çalakiyê de axivî û diyar kir ku 8’ê Adarê bi têkoşîna azadiya Kurd re ketiye qonaxeke nû û destnîşan kir ku felsefeya Rêber Apo ya ‘Jin Jiyan Azadî’ hêza xwe li têkoşîna jinê zêde kir.
Hevseroka Yekîtiya Jinên Elewî ya Demokratîk Songul Morsûmbûl bal kişand ser banga dawî ya Rêber Apo. Songul Morsumnul bang li civaka navneteweyî jî kir ku li hember komkujiyên ku li ser civaka Elewî ya li Sûriyeyê tên kirin têkevin nava tevgerê.
Çalakî bi peyamên jinan ên azadî û hevgirtinê bi dawî bû.
BERLÎN
Li paytexta Elmanya Berlînê bi boneya 8’ê Adarê Roja Jinên Kedkar ên Cîhanê meşek hate lidarxistin.
Meşa hevpar a ji aliyê Meclisa Jinê ya Dest Dan-Hêvî, Cenî (Ofîsa Aştiyê ya Jinên Kurd), Rêxistina Sîwan a Meclisên Jinên Êzidî, TekoJIN-Berlîn, Jinên Xwendekarên-Berlîn, KJAR-Berlîn, PUHUDEPA, Women Defend Rojava-Berlîn, Gemeinsam Kämpfen-Berlîn û Komîteya Junge hate lidarxistin. Bi sedan jinên Kurd ên li Berlînê li Brandenburger Torê kom bûn. Çalakî bi xwedina peyama Rêberê Gelê Kurd Abdullah Ocalan a bi wesîleya 8’ê Adarê Roja Jinên Kedkar ên Cîhanê ji bo jinan şandibû, destpê kir.
Piştre li ser navê Meclisa Jinan a Dest Dan-Hêvî ev tişt hatin gotin: “Em jin bi sedsalan e ji bo mafên xwe têdikoşin. Ev têkoşîna ji bo mafê dengdanê, şert û mercên xebatê yên wekhev, azad û xwedîderketina li jiyana xwe îro jî didome. Mîrateya wan têkoşîna me ye.
Jin ti carî serî netewandine û îro jî serî netewînin. Li Rojava, Îranê û li her derê Kurdistanê jin li dijî zilmê li ber xwe didin. Dirûşma ‘Jin, Jiyan, Azadî’ ya ku piştî qetilkirina Jîna Emînî bilind bû, îro li hemû cîhanê bûye sembola azadiya jinê.
Em cîhanek ku jin azad, bi xwezayê re lihevhatî, wekhev û demokratîk be dixwazin. Şerên we, zilma we û pergala we ya mêtingerî ya ku ji me dizî, em paşde digirin. Em dixwazin bi nasname, çand û baweriyên xwe re di nava aştî, hevgirtin û wekheviyê de bijîn. Em ê têkoşîna xwe ya ji bo jiyanek azad, xwerêveberî û siberojeke bê mêtingerî bidomînin.”
Piştî axaftinan heta Qada Alexanderplatzê meşiyan û bê navber dirûşmên “Sara, Rojbîn, Ronahî, Jin, Jiyan, Azadî” û “Bijî Rêber Apo” berz kirin.
