Li Herêma Bakur û Rojhilatê Sûriyeyê çalakî û şahiyên 8’ê Adarê Roja Jinan a Cîhanê bi dirûşma “Bi felsefeya Jin, Jiyan, Azadî ber bi Sûriyeya Demokratîk ve” dewam dikin.
HESEKÊ
Nivîsgeha Jinên Ciwan a Meclisa Ciwanan a Sûriyeya Demokratîk panelek bi sernavê “Bi piştgiriya jinên ciwan em Sûriyeke demokratîk ava dikin” li dar xist. Panel li Xwaringeha Semerqend a bajarê Hesekê bi amadebûna bi dehan jinên ciwan, nûnerên partiyên siyasî û rêxistinên jinan pêk hat.
Axaftina desptêkê ya panelê ji aliyê hevseroka Meclisa Ciwanan a Sûriyeya Demokratîk Lîna El Zahir ve hat kirin. Lîna îşaret pê kir ku têkoşîna jinan ne nû ye, lê belê berdewama rola wan a dîrokî di avakirina şaristaniyan de ye. Her wiha got, jin di dîrokê de xwedawend, dayik, rêveber, cotkar, bijîşk, şervan û rêveber bûn.
Mijara duyemîn a bi navê “Çawaniya sepandnina ezmûna jinên ciwan a li Bakur û Rojhilatê Sûriyeyê li ser asta welat” ji aliyê rêvebera Nivîsgeha Jinên Ciwan a Meclisa Ciwanan a Sûriyeya Demokratîk Naiya Yûsif ve hat birêvebirin. Nadiya Yûsif bal kişand ser siyasetên desthilata nû ya Şamê jî û diyar kir ku desthilata Şamê hewl dide jinên ciwan paşguh bike û wan ji nivisandina destûra nû ya Sûriyeyê dûr bixe û got: “Em van siyasetan red dikin. Em teqez dikin ku temsîla jinên ciwan di destûrê de gava bingehîn a pêşxistina siberoja Sûriyeyê ye.”
Beşdaran jî li ser mijarên panelê nêrînên xwe anîn ziman û di dawiyê de wekî encam ev pêşniyar derketin pêş; bi mijarên pirsigrêkên jinan de semînerên zanistî werin lidarxistin, têkilî bi jinên ciwan ên li parêzgehên din ên Sûriyeyê re werin avakirin, piştevaniya jinên ciwan ên li herêmên din ên Sûriyeyê, ezmûna li Bakur û Rojhilatê Sûriyeyê veguherînin herêmên wan, balkişandina ser rola jinan di qada siyasî de û pêşxistina wan di navendên biryarê de, mîsogeriya beşdariya jinên ciwan di destûra nû ya Sûriyeyê de.
HOL
Li bajarê Holê jî jinan bi munasebeta 8’ê Adarê serdana saziyên Rêveberiya Xweser û Hêzên Ewlekariya Hundirîn kirin. Jinan di serdanê de plaketa bi wêneyên şehîdan diyarî endamên jin ên saziyan kirin.
Di serdanan de rêvebera Meclisa Kongra Star a bajarê Holê Bedriya El Hisên 8’ê Adarê li tevahî jinan pîroz kir û bal kişand ser rola jinên ku di qada parastinê de cih digirin.
Bedriya El Hisên her wiha got: “Jinên li Bakur û Rojhilatê Sûriyeyê hêza xwe ji mîraseya berxwedan û têkoşînê digirin. Em ê rêya şehîdên ku ji bo azadî û wekheftyê têkoşîn kirine, bidomînin.”
ŞEDADÊ
Li bajarê Şedadê jî endamên Kongra Star bi boneya 8’ê Adarê serdana saziyên sivîl û xizmetguzarî kirin.
Endamên Kongra Star di serdanan de 8’ê Adarê li jinan pîroz kir û diyarî pêşkêşî wan kir. Rêvebera Kongra Star Emîna El Seed 8’ê Adarê li jinên Bakur û Rojhilatê Sûriyeyê, tevahiya cîhanê û Rêber Abdullah Ocalan û dayikên şehîdan pîroz kir û got: “Beriya niha jin ji ber pergala baviksalar dihatin biçûxistin, lê îro bi saya Rêber Abdullah Ocalan cihê xwe di tevahî qadên jiyanê de digirin û gavên girînng ber bi wekhevî û azadiyê ve avêtin.”
DIRBÊSIYÊ
Bi heman armancê jinên ji Hesekê, Dirbêsiyê û Zirganê, endamên Tevgera Jinên Ciwan, tevgerên jinan, nûnerên sazî û meclisan ên kantona Cizîrê serdna Jinwar ê li bajarê Dirbêsiyê kir. Jinan ku bi cilên xwe yên neteweyî serdana Jinwar kir, 8’ê Adarê li jinên ku li gund dimînin pîroz kirin.
Jinan li Jinwarê dar jî çandin, piştre govend gerandin û dirûşmên “Jin, Jiyan, Azadî” berz kirin.
