Li gorî daxuyaniya IOM’ê, bota lastîkî di 6ê Sibatê de li nêzî bajarê Zuwara yê Lîbyayê wergeriya. Hat diyarkirin ku xebatên lêgerîn û rizgarkirinê ji hêla meqamên Lîbyayê ve hatine meşandin; her wiha hat zanîn ku ji her du jinên hatine rizgarkirin, yekê hevjînê xwe û ya din jî du zarokên xwe yên piçûk di qezayê de winda kirine. Bi giştî hat ragihandin ku 53 kes mirine an jî winda bûne.
Li gorî agahiyên ku kesên sax mayî dane, keleka ku piraniya wan koçberên Afrîkayî tê de bûn, êvara 5ê Sibatê ji Zawiyeya nêzî Trablusê bi rê ketiye. Bot piştî nêzî şeş saetan dest bi girtina avê kiriye û noqî avê bûye.
Bi vê karesata dawî re, ji serê sala 2026an û vir ve hejmara koçberên ku di rêya koçê ya Deryaya Navîn a Navîn de wekî mirî an jî winda hatine tomarkirin, herî kêm gihîşt 484 kesan. IOM’ê bi bîr xist ku Deryaya Navîn a Navîn di cîhanê de rêya herî kujer a koçberiyê ye û daxuyand ku sala par li ser vê xetê 1.340 kesan jiyana xwe ji dest dane.
Saziya ser bi Neteweyên Yekbûyî, ji bo têkoşîna li dijî mişextvaniya mirovan û bazirganiya mirovan banga hevkariyeke navneteweyî ya bihêztir kir û destnîşan kir ku avakirina rêyên ewle û bipergal ên koçberiyê xwedî girîngiyeke jiyanî ye.
