Parlamentoya Ewropayê rêziknameyeke nû ya ku di polîtîkayên koçberiyê de tundbûnê pêşbînî dike, qebûl kir. Rêzikên nû armanc dikin ku kesên daxwaza wan a penaberiyê hatî redkirin, hêsantir û zûtir bişînin derveyî YE’yê.
Di çarçoveya vê rêziknameyê de, welatên endamên Yekîtiya Ewropayê dê bikaribin li derveyî sînorên YE’yê navendên vegerandinê ava bikin. Tê plankirin ku di van navendan de koçberên daxwaza wan a penaberiyê hatî redkirin û biryara derketina ji welat ji bo wan hatî girtin, bêne ragirtin.
DERSÎNORKIRINA BI DARÊ ZORÊ DIKARE BIBE ESAS
Bi vê nivîsa nû re, li şûna sepana vegera bi daxwaz a ku heta îro di pêşiyê de bû, dibe ku dersînorkirina bi zorê bikeve şûna wê. Her wiha ji bo kesên ku derketina ji welat red dikin, cezayên girantir têne pêşbînîkirin.
Di nav van cezayan de ev hene:
- Destdanîna ser belgeyên nasnameyê,
- Binçavkirin an jî çavdêriya îdarî,
- Dirêjkirina qedexeya ketina nav YE’yê.
DEMA ÇAVDÊRİYÊ DIKARE HETA 24 MEHAN DIRÊJ BIBE
Yek ji sernavên herî balkêş ên rêziknameyê jî dirêjkirina dema çavdêriya îdarî bû. Li gorî vê, dema ragirtina koçberan a di navendên girtî de dikare heta 24 mehan bê dirêjkirin. Welatên endam, ji bo kesên ku wekî “bi rîsk” an “metirsîdar” têne dîtin, dikarin vê demê hîn bêtir dirêj bikin.
Her wiha tê plankirin ku biryara dersînorkirinê ya ku welatekî YE’yê daye, li welatên din ên endam jî derbasdar be. Bi vî awayî, wekî mînak biryareke ku li Fransayê hatî girtin, dê li Îspanyayê jî were sepandin.
NAVENDÊN VEGERANDINÊ BIBE SEDEMA BERTEKAN
Navendên ku tê plankirin li derveyî YE’yê werin avakirin, li Ewropayê demeke dirêj e mijara nîqaşê ne. Sepanên bi vî rengî berê bi modela Îtalya-Arnavûtyayê û peymana Îngilistan-Ruandayê hatibûn rojevê.
Hinek welatên YE’yê piştgiriyê didin vê modelê, lê welatên wekî Fransa û Îspanyayê li ser bandoriya wê bi guman in.
HÊ JÎ NE TEQEZ E
Rêziknameya ku Parlamentoya Ewropayê pejirandiye hêj bi dawî nebûye. Nivîs dê niha bikeve pêvajoya muzakereyan a bi Konseya Ewropayê re. Heke piştî pejirandina dawî were qebûlkirin, rêzikname dê li hemû welatên YE’yê rasterast were sepandin.
