Li navçeya Cizîr a Şirnexê bi şîara ‘Rêbertiya Azad, Civaka Demokratîk’ Newroz hate pîrozkirin. Bi hezaran kesan di saetên zû de qada Newrozê tejî kirin. Welatiyên ku cil û bergên neteweyî li xwe kirin, bê navber dirûşmeya ‘Bijî Serok Apo’ berz kirin. Bi deh hezaran kesan li ber stranan govend gerandin.
Endama Meclîsa Aştiyê ya Şirnexê Hatîce Beytur got, “Em hêvî dikin ev Newroz bibe wesîleya aştî û azadiyê, eger em hemû vê berpirsyariyê bigirin, aştî nêz e.”
Dayikên aştiyê kevokên ku sembola azadiyê ne, firandin û Komîteya Amadekar a Newrozê jî gel silav kir.
Parlamenterê DEM Partiyê yê Şirnexê Mehmet Zekî Îrmez bang li her kesê kir ku xwedî li banga Rêber Apo ya ‘Aştî û Civaka Demokratîk’ derbikevin û got, “Em ê têkoşîna xwe mezin bikin û bi serketinê tacîdar bikin.”
Alîkarê Hevserokatiya Giştî ya DBP’ê Huseyîn Bîrlîk jî wiha got: “Îro bila Birêz Ocalan dengê we ji Îmraliyê bibihîze. Birêz Ocalan bi banga 27’ê Sibatê re derfeteke sedsalî da. Hûn îro hatin vê qadê û xwedî li vê bangê derketin. Em ji gelê xwe, partî û Rêberê xwe bawer dikin.”
Piştre peyamên girtiyan, hatin xwendin.
Hevşaredara Bajarê Mezin a Wanê Neslîhan Şedal ev tişt got: “Di dîrokên Newrozê de Cizîr xwedî cihekî cuda ye. Ev têkoşîn bi welatparêziya we destpê kir, hûn ji hemû cîhanê re bûn mînak.”
Parlamentera Şirnexê Newroz Uysal Aslan jî got, “Ji ber banga Birêz Ocalan, wateyeke cuda ya vê Newrozê heye. Eger demokrasî çênebe, aştî jî nayê, azadî jî nayê. Eger zimanê gelekî qedexe be, azadiya wê jî qedexe ye.”
Endama Desteya Rêveber a Navendî ya Partiya Wekhevî û Demokrasiyê ya Gelan (DEM Partî) Elîf Bulut jî ev tişt ragihand: “Me ti carî dest ji têkoşîn û berxwedana xwe berneda. Peyama Birêz Ocalan, asoyeke nû ji me re vekir. Di çarçoveya vê peyamê de, em têkoşîna bi rengekî hevpar dimeşînin. Têkoşîna sedsalî ya gelê Kurd bi têkoşîna gelan re bû yek. Em ê civaka demokratîk ava bikin.”
Piştî axaftinan, hunermend Rojda, Kasim Taşdogan û Şervan derketin ser dikê.
