Komeleya Çand û Ziman ya Birca Belek û Komeleya Çand û Ziman ya Cûdî (CÛDÎ DER) bi wesîleya 21’ê Sibatê Roja Zimanê Dayikê ya Cîhanî li navçeya Cizîrê meşek ki dar xistin. Meş, bi şîara; ‘’Ji Kurdî re statu û perwerdehiya bi Kurdî’’ hate lidarxistin û gelek kes bi cil û bergên xwe yên gelêrî beşdarî meşê bûn.
Gelê ku li pêşiya Keleha Birca Belek li hev civiya, li gel stranên bi Kurdî govend gerand. Di çalakiyê de pankarta bi nivîsa; ‘’Statuya Kurdî, perwerdehiya bi Kurdî” hate vekirin û gel heya Medreseya Sor meşiya. Di tevahiya meşê de dirûşmeyên; “Zimanê Kurdî rûmeta me ye” û “Ziman, jiyan, azadî”hatin berzkirin û dowîzên bi nîvîsên; “Ez kurd im, zimanê kurdî dixwazim”, “Ez kurdî dijîm” û “Divê kurdî bibe zimanê fermî” hatin hilgirtin.
Piştî meşê Hevseroka CÛDÎ DER’ê Evîn Kûlja axivî û got: ‘’Mafê me yê herî xwezayî ye ku Kurdî bibe zimanê perwerdeyê. Gelê Kurd, bi salan e li qadan jibo vê yekê têdikoşe.
Piştre Hevserokê Giştî yê Partiya Herêmên Demokratîk (DBP) Keskîn Bayindir avivî û ev yek anîn ziman: ‘’Tu pergal, bi qasî Tirkiyeyê nebûye dijminê zimanekî. Dibêjin ku ger Kurdî bibe zimanê perwedeyê, zimanê fermî û zimanê rojane wê dewleta me hilweşe. Ew qasî jî ehmeq in. Ev der Kurdistan e. Welatê Melayê Cizîrî ye. Hûn ê li vir zimanê Kurdî qedexe bikin û li Enqereyê jî bibêjin em birayê hevûdu ne. Durist bin. Ger hûnê qala biratiyê bikin, wê demê dawiyêli zextên li ser ziman û çanda me bînin.
Em ê li her derê parastina zimanê xwe bikin. Em ê her cihî û her malê bikin dibistanên Kurdî. Ev berpirsiyariya me ya dîrokî ye. Em ê li benda dewletê nesekinin. Heta ku Kurdî bibe xwedî statû û zimanê fermî wê têkoşîna me bidome. Em ê xewn û xeyalên xwe bi Kurdî bibînin. Ev ziman zimanekî pîroz e û hebûn û rûmeta me ye. Sed sal in hûn negihîştin mexseda xwe. Hûn ê ji niha şûn ve jî negihîjin mexseda xwe. Zimanê me xewna me, siboroja me û xerca yekîtiya me ye. Zimanê rûmeta me ye.”
