Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan di civîna koma partiya xwe de ya heftena li Meclîsê pêk anî, li ser rojevê daxuyaniyên girîng da.
Bakirhan bal kişand ser bûyerên li Rojhilata Navîn û diyar kir ku di dema nû de şer ne tenê bi rengê leşkerî, di heman demê de wê li ser rêyên bazirganiyê û xetên derbasbûnê bê meşandin.
Tûncer Bakirhan di nirxandina xwe ya têkildarî şerê li Îranê de işaret bi “sê xetan” kir ku Rêber Apo beriya niha bal kişandibû ser wê û got, “Xeta destpêkê xeta Îsraîlê ye. Xeta duyemîn xeta bi serkêşiya Îngilistanê ye. Ev jî aqlê statukoparêz e ku li gorî hevsengiyê tevdigere. Xeta sêyemîn jî xeta jiyana hevpar û demokrasiyê ye. Yanî ew xet û têkoşîn e ku em di oxira wê de berdêlan didin. Ev jî ew aqil e ku civaka demokratîk dixwaze. Di serî de Îran niha li gelek deveran ev hersê xet li hemberî hev in.”
Bakirhan destnîşan kir ku weke DEM Partî ew li Rojhilata Navîn û Îranê xeta demokrasî û jiyana hevpar diparêzin.
Hevserokê DEM Partiyê ragihand ku Kurd ne amûra hêzên herêmî û navneteweyî ye û anî ziman ku gelê Kurd li her welatên ku lê ne dixwazin pirsgirêka xwe bi paytextên wan welatan çareser bike.
Tûncer Bakirhan got, “Bi parçekirina Kurdan, bi nîşandana wan a bi rengekî cuda hûn nikarin bigihêjin cihekî. Em bi eşkere dibêjin. Kurd dixwazin pirsgirêkên xwe bi paytextên welatên lê ne çareser bikin. Gelo em şaşitiyê dikin? Li Tirkiyeyê eger pirsgirêka me heye em dixwazin bi Enqereyê re çareser bikin. Li Iraqê Kurd dixwazin pirsgirêka xwe bi dewleta Iraqê re çareser bike. Wê bi kê re çareser bikin? Li Sûriyeyê eger pirsgirêk hebe muxatabekî xwe Kurd e, muxatabê din jî rêveberiya Sûriyeyê ye. Li Îranê Kurd dixwazin pirsgirêkên xwe bi dewleta îranê re çareser bikin. Lê belê divê hurmet ji vê sekna Kurdan re bê nîşandan.”
Bakirhan diyar kir ku nêzîkatiya ku cudahiya “Kurdê baş-Kurdê nebaş” dike, siyaseta parçe bike-birêve bibe ye û ragihand ku ev ziman çareseriyê bi xwe re nîne, lê neçareseriyê bi xwe re tîne.
Bakirhan destnîşan kir ku welatên herêmê dema maf û hebûna Kurdan nas kirin, ev yek wê ne tenê ji bo Kurdan her wiha ji bo wan welatan jî bibe gaveke xurt.
Bakirhan got, “Divê êdî dest ji statuko û neçareseriyê berdin. Eger Tehran mafê Mahabadê nas bike wê bi xwe jî xurt bibe. Şam eger Kobanê qebûl bike wê Sûriye xurt bibe. Bexda eger mafên Hewlêr, Silêmaniyeyê nas bike wê Iraq xurt bibe. Enqere eger hiqûqa Amedê nas bike wê xurt bibe, mezin bibe, demokratîk bibe. Bi vê perspektîfê hem welatên herêmê hem jî Kurd wê bi ser bikevin. Polîtîkaya bi ser bikeve, bi ser bixîne ev e.”
Bakirhan diyar kir ku Tirkiye di nava pêvajoya herî hêja û stratejîk a dîroka xwe ya 100 salî de ye û destnîşan kir ku pêvajoya aştî û civaka demokratîk bêyî derengxistinê divê bê pêşvebirin. Ji bo vê jî Tûncer Bakirhan xwest ku êdî gav bêne avêtin.
