Li navçeya Dihê ya Sêrtê pîrozbahiya Newrozê bi coşeke mezin hat lidarxistin. Pîrozbahiya ku parlamenterê DEM Partiyê Omer Ocalan beşdar bû de gel bi berzkirina dirûşman û gerandina govendê Newroz pîroz kirin.
Di tevahiya pîrozbahiyê de girseyê dirûşma “Jin, jiyan, azadî” û “Newroz pîroz be” berz kir. Welatiyên ku bi fularên kesk, sor û zer û cilûbergên Kurdî hatin qadê, heta demekî dirêj li ber dahol û zirneyê govend gerandin.
Parlamenter Omer Ocalan di pîrozbahiyê de axivî û wiha got: “Em ê deriyê şer bigirin. Pergala demokratîk ji bo gelan jiyaneke nû ye. Birêz Ocalan ji bo vê, ji bo we dixebite. Lê belê provokasyonan dikin. Duh li Kobanê ji malekê 7 zarok, dayik û bavê wan hatin qetilkirin. Ma ev gel dê vê çawa qebûl bike? Kuştin û qetilkirinê qebûl nake. Divê ev provokasyone bên bidawîkirin. Dema hûn ji Kurdan re dibêjin ‘em bira ne’ wê demê li gorî wê tevbigerin. Mirinê li Kurdan ferz nekin. Di pergaleke demokratîk de bijîn. Pergala ku em ê li ser vê xakê biafirînin, ji pergala dewletê mezintir e. Gelê Kurd pergala xwe di dil û zîhna xwe de ava kiriye.”
Ocalan axaftina xwe wiha bi dawî kir: “Di dîroka Kurdan û Kurdistanê de Dihê bi tîpên zêrîn hatiye nivîsandin. Em ê xwedî li vê nirxê derkevin. We têkoşîna xwe çawa pêş xistibe, dê wisa çareseriya xwe jî pêş bixin û welatê xwe û birêz Ocalan jî azad bikin.”
Li navçeya Dîgorê ya Qersê agirê Newrozê hate hilkirin. Bi sedan welatî tevlî pîrozbahiyê bûn. Parlamenterê DEM Partiyê yê Îdirê Yilmaz Hun di pîrozbahiyê de axivî û got: “Gelê me ji bo Newroza xwe azad pîroz bike gelek bedel da. Îro li her çar parçeyên Kurdistanê agirê Newrozê hil e. Ev agir, heta azadiyê dê her wê hil bibe.”
Parlamentera DEM Partiyê ya Sêrtê Sabahat Erdogan Saritaş jî diyar kir ku di serdemeke dîrokî de ne û wiha got: “Di vê Newrozê de banga aştiyê ya birêz Abdullah Ocalan hat. Mizgîniyeke mezin da. Ev bang, xwedî girîngiyeke dîrokî ye. Ji bo hemû gelan bangekî birûmet e. Heke pirsgirêka Kurd çareser bibe, dê hemû pirsgirêkên aborî û siyasî bên çareserkirin.”
Piştî axaftinan, Dayikên Aştiyê agirê Newrozê pêxistin. Pîrozbahî bi gerandina govendê bi dawî bû..
