Omer Cûma Salih ê ku li Girtîgeha Girtî ya Ewlehiya Bilind a Hejmar 2 ya Xarpêtê tê rehîngirtin, di hevdîtineke xwe ya li gel parêzerê xwe ya 14’ê Tîrmehê de diyar kir ku ji aliyê gardiyanan ve êşkence lê hatiye kirin. Omer Cûma Salih ê ji bajarê Helebê, anî ziman ku di dema lêgerînê de rastî êşkenceyê hatiye û got: ‘’Bi daran li piyê min xistin û milê min zivirandin. Ez birim odeyeke yekkesî û bi saetan li wir sekinandin.’’
Omer Cûma Salih diyar kir ku zextên li girtîgehê berdewam dikin û anî ziman ku lêgerînên kawîşan zêde bûne, bi şev derengî bi ser kawîşan de diavêjin û eşyayên wan tên belavkirin. Salih destnîşan kir ku daxwaza wî ya hevdîtina li gel rêveberiya girtîgehê hatiye redkirin.
Mehmet Mîraç Dînç jî ku li heman girtîgehê dimîne, di hevdîtina bi rêya telefonê de ji malbata xwe re anîye ziman ku li girtîgehê êşkence tê kirin. Dînç da zanîn ku divê dawî li zextan were.
Hate ragihandin ku parêzer wê li hemberî êşkenceya berbehs giliyê bikin.
