Şerê Îsraîl-Îranê ku di 13 Hezîranê de destpê kir, di 24’ê Hezîranê de bi ragihandina agirbestê sekiniye. Di şeva 24’yê Hezîranê de balafirên şer yên Îsraîlê girtîgeha Evîn ya li Tahranê jî bombebaran kiribûn.
Berdevkê Saziya Dadwerî ya Îranê Esxer Cehangîr derbarê êrişa Îsraîl ya li ser girtîgeha Evînê de daxuyaniyek da.
Esxer Cehangîr got ku di encama êrişa Îsraîl ya li ser girtîgeha Evîn ya li Tahranê de, 71 kesan jiyana xwe jidest dane û got; “Kesên jiyana xwe ji dest dane karmendên girtîgehê, ciwanên ku xizmeta leşkerî dikirin, hinek ji girtiyên di girtîgehê de, xizmên girtiyên ji bo serdanê hatibûn girtîgehê û hinek jî cîranên girtîgehêne.”
Cehangîr got ku ji ber êrişê ziyanek mezin gihiştiye avahiya girtîgehê, cihê hevdîtina malbat û girtiyan û avahiya dozgeriya giştî ya li girtîgehê.
Hêjayî gotinê ye girtîgeha Evîn dikeve taxa Evîn ya li herêma Şehran ya li paytexta Îran, Tahranê. Divê girtîgehê de Werîşe Mûradî û Pexşan Ezîzî jî di nav de gelek girtiyên din yên siyasî dihatin ragirtin.
