Serokê Meclîsê ji Rojnameya Mîlliyetê re axivî û li ser Pêvajoya Aştî û Civaka Demokratîk, karên komîsyonê û hevdîtina bi Rêber Apo re daxuyanî da.
Kûrtûlmûş got, “Parlamenterên ku çûn Îmraliyê wê çavdêriyên xwe, notên we ji komîsyonê re ragihînin. Ya girîng ew e ku axaftina li wê derê bi xalên esasî bi komîsyonê re bêne parvekirin. Çavdêriyên parlamenterên li komîsyonê ew bû ku hevdîtineke gelekî erênî, çêker gelekî erênî bû û ji tiştên weke ‘nêrînên Îmraliyê’ jî wêdetir nêzîkatiyeke li pêş, çêker, dilxwaziya aştiyê û çareserkirina vê meseleyê hebû.”
Nûman Kûrtûlmûş diyar kir ku piştî amadekirina rapora li ser sererastkirinên qanûnî wê komîsyon wezîfeya xwe bi dawî bike.
Serokê meclîsê got, “Dil dixwaze ku hemû partî di pêşniyareke hevpar de bigihêjin hev. Ji bo rapora komîsyonê li ser metnên ji partiyan bên mutabaqateke giştî dikare derkeve holê. Înşaleh em ê bi lez vê pêvajoyê biqedînin. Komîsyonê meseleya herî giran a dîroka me ya komarê bêyî şer bike, bêyî pirsgirêkan gihand vê astê. Wê demê demokrasiya Tirk xwedî wê astê ye ku mijara herî zehmet jî dikare muzakere bike. Ev yek divê bandorê li destûra bingehîn û metnên din ên hiqûqê jî bike. Bi dîtina min wê bandoreke erênî bike.”
Kûrtûlmûş got, “Heta niha baş hat, lê belê pêvajoya ji niha û pê ve krîtîk e. Divê kesek berjewendiyên partî yan jî koma xwe nedin pêşî. Divê bê tespîtkirin ku rêxistinê bi hemû endamên xwe çek daniye, dest ji karên xwe yên rêxistinî berdaye. Divê bê dîtin ku li Sûriyeyê jî bi rêveberiya nû re di nava entegrasyonekê de be.”
