Meclisa Malbatên Şehîdan a Taxên Şêxmeqsûd û Eşrefiyê ji bo gerîlaya HPG’ê Axîn Xabûr (Henan Îso) ya ku 11’ê Çileya 2020’an li Garê şehîd bû û şervanê QSD’ê Emîn Gabar (Mistefa Elî) yê ku 8’ê Adara 2018’an di Berxwedana Serdemê de li bajarê Cindirêsê yê Efrînê şehîd bibû merasîm li dar xist.
Bi sedan şêniyên Şêxmeqsûd û Eşrefiyê beşdarî merasîmê bûn ku li Qada Şehîdan a Şêxmeqsûdê hat lidarxistin.
Merasîm bi deqeyek rêzgirtinê dest pê kir. Piştre Hevseroka Meclisa Malbatên Şehîdan a Helebê Remziye Salih axivî û sersaxî ji malbatên şehîdan re xwest.
Remziye Salih anî ziman ku dê şopdarên rêya şehîdan bin û destkeftiyên wan biparêzin.
Endamê Hêzên Ewlekariya Hundirîn Şêro Mihemed jî axivî û got: “Berdêlên ku li hemberî êrîşên dewleta Tirk hatine dayîn, bûn garantiyên ewlehiya civakê û siberoja jiyaneke azad û bi rûmet e.”
Mihemed Şêro destnîşan kir ku dê heya welatekî azad û demokratîk mîrata şehîdan bidomînin.
Endama Mala Êzidiyan Yildiz Marco jî destnîşan kir ku ew bi ramanên azad ên Rêber Apo bawer in û wiha pê de çû “Em ne aşiqên çek û wêraniyê ne, lê em aşiqên aştiyê ne. Tevahî berdêlên ku hatine dayîn di rêya pêkanîna aştiyê de ne.”
Pismamê şehîd Axîn, Şiyar Îso jî axivî û soza şopandina rêya şehîdan da.
Piştî axaftinan wesîqeyên şehîdan hatin xwendin û radestî malbatên wan hatin kirin.
Merasîm bi dirûşma “Şehîd namirin” bi dawî bû.
