Gelê Êzidî û Ereb yên Şengalê bi pêşengiya TAJÊ li dijî tundiya mêr û dewletê meşeke hevpar lidar xistin. Di meşê de hate gotin, her diçe tundiya li ser jinê zêde dibe û li beramber wê jî berxwedana jin jî mezin dibe. Jinên Êzidî û Ereb diyar kirin, li gel zêdebûna tundiya li ser jinê berxwedana jinê jî mezin dibe û gotin: ‘‘Em bi fikrê Rêber Apo li berxwe didin. Emê bi fikrê wî jî serbikevin.’’
Îro di saetên piştî nîvro de jinên Êzidî û Ereb yên Şengalê bi boneya 25’ê Mijdarê roja ‘Têkoşîna bi tundiya li ser jinê re’ bi pêşengiya TAJÊ û Însiyatîfa Jinên Ereb meşek hate lidarxistin.
Meş li ber Şaredariya Gel a Sinûnê ya li nava bazar destpê kir û heya Çerxerêya Mam Zekî dewam kir.
Di meşa ku mêrên Êzidî û Ereb jî tevlîbûn de timî dirûşmeya, ‘Jin jiyan azadî’ hate gotin. Jinên Êzidî û Ereb wêneyên, jinên şehîd û xwîşkên Mîrabel rakirin. Di meşê de posterên Rêber Apo û ala TAJÊ jî hate hilgirtin.
TAJÊ bi dirûşmeya, ‘Tundiya li ser jinê, qirkirina civakê ye’ meş lidar xist, li ber Çerxerêya Mam Zekî Şengalî daxuyaniyeke çapemeniyê da. Di daxuyaniyê de Berdevka TAJÊ Riham Hico û Fatîma Mistefa axivîn.
Destpêkê Riham Hico li ser girîngiya têkoşîna 25’ê Mijdarê kir û wiha axivî: ‘‘Roja 25’ê Mijdarê, roja li beramber zordarî, sextekarî, ne wekhevî û ne dadweriyê deng bilindkirinê ye. Ji ber vêya em îro weke TAJÊ meşiyan û me helwesta xwe nîşan da.’’
Riham Hico dazanîn li beramber tundiya zêde dibe, berxwedana jinan jî zêde dibe û wiha axaftina xwe domand: ‘‘Niha asta têkoşîna jinan li cîhanê gihîştiye asta herî bilind. Lê mixabin hîn jî zilm, zordarî û tundî li ser jinê kêm nebûye. Tundiya ‘qanûnî’, fizîkî û hwd. hem ji aliyê dewlet hem jî ji aliyê mêr ve tê kirin. Roj nîne jin nayên qetilkirin, roj nîne jin di temeneke biçûk de nayên zewicandin û roj nîne ji hev cûdabûn çênabe. Roj nîne serîrakirinên jinan nayên tepisandin. Li beramber zêdebûna tundiya mêr, berxwedana jin jî mezin bûye.’
Berdevka TAJÊ dazanîn, li beramber tundî û êrişa li ser jinê, ancax bi fikrê Rêber Apo bikarin bersivê bidin û got: ‘‘Ji ber êrişeke pir giran li ser jin û civakê heye, ancax bi fikir û îdeolojiyeke gelekî xurt bersiv were dayîn. Ew jî, fikir û îdeolojî jî ya Rêber Apo ye. Ev fikir û felsefeya Rêbertî hemû jinên cîhanê li dora dirûşma, ‘Jin jiyan azadî’ gihandiye hev. Ev jî bixwere têkoşîneke hevpar çêkiriye. Îro jin ne tele li Şengal an li Rojhilat diqîrin, dema li jin li cihekî din diqîrin, hemû jin bi wan re dengê xwe bilind dikin. Em têkoşîn û pêşveşûna xwe diyarî Rêber Apo dikin. Ev têkoşîna me bi fikir û felsefeya wî ye. Em di serî de li dijî tundiya li ser jinê, li dijî her cûre tundiyê têbikoşin.’’
Berdevka TAJÊ Riham Hico, daxwaza azadiya Rêber Apo kir û got: ‘‘Qutkrina me û Rêber Apo ya ji hev bixwe jî tundiye.Heya Rêbertiya me azad nebe, wê edalet pêk neyê. Emê heya azadiyê têkoşîna xwe dewam bikin.’’
Riham Hico herî dawî pêngava li dijî xwekuştinên jin û ciwanan jî bibîrxist û axaftina xwe wiha bi dawî kir: ‘‘Me weke TAJÊ pêngavek li dijî xwekuştinê dabû destpêkirin. Xwekuştin ne diyardeyeke şexsiye, êrişeke pergalê ye. Bila ev roj bibe wesîle ji bo em li dijî her cûre tundiyên mêr, dewletê derbikevin, dawî li tundî û qirkirinan bînin. Emê bi fikrê Rêber Apo li berxwe bidin û têbikoşin. Emê bi fikrê Rêbertî jî serbikevin.’’
Piştî Riham Hico, Berdevka Însiyatîfa Jinên Ereb li Şengalê Fatîme Mistefa jî têkildarî rojê daxuyaniyek xwend û meş bi dirûşmeyên; ‘‘Jin Jiyan Azadî’’ û ‘‘Bijî Rêber Apo’’ bi dawî bû.
