DBP, DEM Partî, TJA, Meclîsa Dayikên Aştiyê, Komeleyên Elewiyên Demokratîk, ESP, HDP, EGETUHAYDER û ANYAKAYDER’ê salvegera komployê li avahiya DEM Partî ya Îzmîrê daxuyanî da. Li salona ku daxuyanî hat dayîn pankarta “Em Meşa Azadiyê silav dikin û komploya navneteweyî şermezar dikin” hat daliqandin. Di axaftinan de azadiya fîzîkî ya Rêberê Gelê Kurd hate xwestin.
ŞIRNEX
Polîsan bi hinceta “qedexeya walîtiyê” li ber avahiya Partiya Wekhevî û Demokrasiyê ya Gelan (DEM Partî) a Şirnexê, hewl dan daxuyaniyê asteng bikin. Daxuyanî tevî hemû astengiyan li ber deriyê avahiya bajêr hat dayîn. Beriya daxuyaniyê polîsan deriyên avahiya partiyê bi mertalan girtin. Li ser vê yekê endama Meclîsa Şaredariya Silopiyayê ya HDP’ê Fehîme Saruhan hat binçavkirin.
Tevî hemû hewldanên astengkirinê jî rêveberên bajar û navçeyan ên DEM Partiyê û DBP’ê, Dayikên Aştiyê, aktîvîstên TJA’yê, rêveberên MEBYA-DER’ê û gelek kes beşdarî daxuyaniyê bûn.
MÊRSÎN
Rêxistina DEM Partiyê ya Mêrsînê jî xwest têkildarî komploya navneteweyî ya 15’ê Sibatê li pêşiya avahiya partiyê daxuyaniyê bide. Beriya daxuyaniyê, ketina avahiyê ji hêla polîsan ve hate girtin. Girseya ku xwest li pêşiya avahiyê daxuyaniyê bide bi dirûşmên “Zext nikarin me têk bibin” û “Hezar silav ji Îmraliyê re” astengkirin protesto kirin. Piştre jî girseyê di nava avahiyê de daxuyanî da.
Hevserokê DEM Partiyê yê Mêrsînê Reşat Aşan di daxuyaniyê de axivî û bertek nîşanî dorpêça polîsan da. Aşan, got ku tevî astengkirinan jî dê li her qadê berteka xwe ya li dijî komploya navneteweyî ya 15’ê Sibatê û tecrîda li Îmraliyê nîşan bidin. Aşan, wiha domand: “Hevalên me yên ku ji bo rakirina tecrîdê li girtîgehê ketine greva birçîbûnê hene. Her wiha dayikên me hewl didin bi Nobeta Edaletê bibin dengê girtiyan. Daxwaza tevahiya derdorên civakê ew e ku tecrîd bê rakirin. Di serî de pirsgirêka kurd, heke em bixwazin tevahiya pirsgirêkên civakê çareser bikin, divê ji ewil tecrîda li Îmraliyê bê rakirin.”
WAN
Rêxistina DEM Partiyê ya Wanê li Kolana Hunerê daxuyanî da çapemeniyê. DBP, TUHAY-DER, Dayikên Aştiyê, TJA, ÎHD, OHD, ÇEV-DER û gelek welatî tev li daxuyaniyê bûn. Di daxuyaniyê de pankarta “Bimre komploya 15’ê Sibatê” hate vekirin û her tim dirûşmeyên “Bijî Serok Apo” hatin berzkirin.
Hevseroka TUHAY-DER’a Wanê Edîbe Babûr a di daxuyaniyê de axivî, anî ziman ku sekna Ocalan a li Girtîgeha Îmraliyê komplo pûç kir û wiha got: “Komploya navnetewî ya 15’ê Sibatê gava herî girîng ku serwerên kurewî û herêmî koletiyê li gelên herêmê ferz bikin bû. Hêzên tarî yên bandora birêz Ocalan a li ser Kurdistan, Tirkiye û Rojhilata Navîn û hêza wî ya avakirina jiyaneke demokratîk dizanin, komploya navnetewî plankirin û di kesayeta birêz Ocalan de xwestin hemû gelan teslîm bigirin.”
MÛŞ
Rêxistina DEM Partiyê ya Mûşê li avahiya bajêr civîna çapemeniyê li dar xist. Di civînê de Hevserokê DEM Partiya Mûşê Mehmet Yafes Dînar daxuyaniya hevpar xwend.
ERDEXAN
Rêxistina DEM Partiyê ya Erdexanê jî li avahiya xwe ya bajêr civîna çapemeniyê li dar xist. Gelek kes û nûnerên saziyên sivîl ên civakî beşdarî civînê bûn. Di civînê de Hevserokê DEM Partiyê yê Erdexanê Engîn Çelîk axivî.
BEDLÎS
Rêxistina DEM Partiyê ya Tetwanê jî di avahiya navçeyê de civîna çapemeniyê li dar xist. Li eywana ku civîn lê hate kirin pankarta “Em komploya 15’ê Sibatê lanet dikin” hate daliqandin. Hevserokê DEM Partiyê yê Bedlîsê Fîkret Bîrlîk ê di daxuyaniyê de axivî, diyar kir ku bi paradigmaya demokratîk, ekolojîk û azadîxwaziya jinê ku Abdullah Ocalan pêşxist komplo hate pûçkirin û anî ziman ku paradîgma bû heviya gelên bindest.
COLEMÊRG
Rêxistinên DEM Partiyê yên Colemêrg û Geverê jî bi boneya 25’emîn salvegera komploya navneteweyî sînevîzyoneke ku pêvajoya 25 salan a komployê vedibêje pêşandan. Bername li avahiya partiyê hat lidarxistin û gelek endamên partiyê û kes tev li bûn. Hevserokê DEM Partiyê yê Bajar Kadîr Şahîn di bernameyê de axivî û got ku ew komploya navneteweyî şermezar dikin. Şahîn, anî ziman ku ji bo aştiyê divê tecrîd bê rakirin. Li Geverê jî li navenda koordînasyona hilbijartinê ya DEM Partiyê ya navçeyê sînevîzyon hate pêşandan. Dayikên Aştiyê û gelek welatî tev li bûn.
Hevserokê DEM Partiyê yê Geverê Ercan Sevmez bal kişand ser polîtîkayên tecrîdê û ev tişt anî ziman: “Birêz Ocalan, tecrîda ku di şexsê wî de hatiye destpêkirin û li ser hemû qadên civakê hatiye belavkirin û komploya navneteweyî vala derxist û têkoşîna xwe ya ji bo aştiyê didomîne.” Piştî axaftina Sevmez, sînevîzyona ku pêvajoya komployê vedibêje hate pêşandan. Piştî sînevîzyonê, welatiyan dirûşma “Bijî Serok Apo” berz kirin.
