Beriya meşa bi dirûşma “Em li dijî polîtîkayên narkotîk, fûhûş û şerê taybet dimeşin” gel li ber Febrîqeya Halîs Toprak li hev civiya.
Li gel Hevseroka Giştî ya Partiya Herêman a Demokratîk (DBP) Çîgdem Kiliçgun Ûçar girseya gel ji vê derê ber bi navenda bajêr ve meşiya.
Di meşê de pankarta bi nivîsa “Gelê Licê li dijî polîtîkayên şerê taybet, fûhûş û narkotîkê dimeşe” hate vekirin û dirûşmên “Li hemberî narkotîk û fûhûşê şiyar be”, “Jin, Jiyan, Azadî” û “Na ji fûhûş û narkotîkê re” hatin qîrîn.
Meş li Qada Demokrasiyê bi dawî bû. Di axaftinan de hate ragihandin ku narkotîk û fûhûş polîtîkayên bi zanebûn e ku li dijî avaniya civakî têne meşandin.
Hevberdevkê Platforma ‘Şiyar Be!’ Mûrat Kan bi pêşengiya jin û ciwanan bang kir ku li dijî van pirsgirêkan têkoşîn bê meşandin.
Kan got, “Em dixwazin li ser nirxên xwe civakeke nû ava bikin. Em ê rê nedin narkotîk û fûhûşê. Em ê xwe bi rêxistin bikin û zêde bibin.”
Hevseroka Giştî ya DBP’ê Çîgdem Kiliçgun Ûçar nerazîbûn nîşan da ku narkotîk û fûhûş weke rastiyeke Kurdistanê tê nîşandan û got, bi têkoşîna aştî û civaka demokratîk re wê li ber van polîtîkayan rabin.
Çîgdem Kiliçgun Ûçar pirsa “Kî destûrê dide vê trafîka mezin a narkotîkê?” kir û got, “Hûn neçar in bersiva vê pirsê bidin. Ya hûn hevkarê wê ne yan jî dijberê wê ne. Lice, Amed wê her tim ji bo me bi berxwedan û azadiyê bê bîranîn.”
Çîgdem Kiliçgun Ûçar banga Aştî û Civaka Demokratîk a Rêber Apo bi bîr xist û got, “Em ê ji Licê dest bi avakirina aştî û civaka demokratîk bikin. Li dijî narkotîk û fûhûşê em ê li her taxê komunên piştevaniyê ava bikin. Em ê van nebaşiyên ne yên me ne, ji nava xwe biqewirînin. Amedê, Licê bi vê meşê îradeyeke mezin nîşan dan. Dem ew dem e ku em vê îradeyê xurt bikin, mezin bikin.”
Meş bi dirûşma “Em ê bi hev re têkoşînê bimeşînin, bi hev re bi ser bikevin” bi dawî bû.
