Li Maliyê cûntaya leşkerî piştî êrîşên koordîneyî û berfireh ên rojên dawî, rû bi rûyê têkçûneke cidî ye.
Hêzên Koma Piştgiriya Îslam û Misilmanan a Cîhadîst (JNIM) a girêdayî El Qaîdeyê û Eniya Rizgariyê ya Azavad ku serxwebûna Tuaregê dixwaze, bi operasyonên koordîneyî li bakurê welêt û derdora paytext Bamakoyê hevsengî guhertin.
Hêzên Azavad di nava 3 rojên dawî de li gelek bajarên li bakur, êrîşên hemwext pêk anîn. Ji roja Yekşemê û vir ve, Kîdal bi temamî ket kontrola van hêzan. Şervanên Tuareg ku di demek kurt de kontrola qadên berfireh bi dest xist, ragihand ku Azavad serbixwebûna xwe îlan kiriye.
Şer tenê li bakur sînordar nema. Êrîş gihiştin deriyên paytext Bamakoyê jî.
Balafirgeha Navneteweyî ya Bamako-Senou ya li paytextê jî dawiya hefteyê bû hedefa êrîşan. Niştecihên herêmê diyar dikin ku ew ji ber ewlehiyê ji malên xwe dernakevin.
Lez û asta êrîşan, endamên Koma Wagner a Rûs jî ya ku bi artêşa Malî re tevdigere, bêbandor kir. Hat ragihandin ku Wezîrê Parastinê yê Malî û yek ji pêşengên cuntayê Sadio Camara di êrîşan de jiyana xwe ji dest dan.
Li aliyê din, li gorî çavkaniyên ewlehiyê şefê îstixbaratê Modibo Kone û Serfermandarê Giştî Oumar Diarra jî di şer de birîndar bûn.
