Ji aliyê Platformên Saziyên Demokratîk di çarçoveya 47’emîn salvegera damezrandina PKK’ê de li Taxa Tozkoparan a Tarsusê pîrozbahiya bi dirûşmeya ‘Di Civaka Demokratîk De Ji Nû Ve Zayîn’ hate lidarxistin.
Bi sedan kes tevlî çalakiyê bû, piraniya wan ji jin û ciwanan pêk dihat. Di pîrozbahiyê de sirûda Çarxa Şoreşê hate gotin û posterê Rêber Apo hate vekirin. Bi êrîşa polîsan poster hate girtin û ciwanan dirûşmeyên Bijî Serok Apo”, “Jin, jiyan, azadî” û “Jin jiyan azadî, azad bike rêbertî” berzkirin.
Hevserokê DEM Partî yê Mêrsînê Reşat Aşan di çalakiyê de axivî. Aşan diyar kir ku gelê Kurd bi sedan sal e tê tunehesibandin û di encama berdêlên hatin dayîn de ev rastî hate naskirin. Aşan wiha got, “Dema ku gelê Kurd di nava xwe de yekîtiyê ava bike, wê li Rojhilata Navîn pêşiya aştiyê vebibe. Ev têkoşîna ku ji bo di çar parçeyên Kurdistanê de bi hev re jiyankirina gelan e. Ev têkoşîn ji me re mîras e.”
Hevserokê DEM Partî yê Mêrsînê Alî Bozan jî destnîşan kir ku gelê Kurd tevî zextên li ser çand û nasnameya xwe jî tawîz ji azadiya xwe nedaye û wiha got, “Em Kurd in, zimanê me Kurdî ye. Zimanê me nasnameya me ye. Em ji Tarusê peyam dişînin; Em li pişt Rêberê xwe û Tevgera Azadiyê ne.”
Bozan bertek nîşanî desteserkirina posterê Rêber Apo ji aliyê polîsan ve da û got ku Emniyeta Tarsusê pêvajoyê fêm nekiriye û li gorî Pêvajoya Aştî û Civaka Demokratîk tevnagere. Bozan got, “Dixwazin provakasyonê bikin. Birêz Abdullah Ocalan mîmarê sereke yê Pêvajoya Aştî û Civaka Demokratîk. Her kes neçar e tehemûlê nav, poster û wêneyê wî bike. Em ê tevî her tiştî demokrasiyê bînin vî welatî û komara demokratîk ava bikin. Em ê bi ciwanan re aştî û civaka demokratîk bînin.”
Pîrozbahî bi stranên hunermendên Atolyeya Kolektîf a Sanatolia û gerandina govendê bi dawî bû.
