Semîner ji aliyê Otonomîya Federal a Netewî û Çandî ya Kurdên Rûsyayê ve hate lidarxistin.
Hevserokê Otonomîya Federal Ferhat Patîyev di derbarê vê semînerê de ev tişt got: “Ev çar sal in em diçin dibistanan perwerde didin. Perwerdeya me piranî li ser çand, dîrok, zimanê Kurdî ye. Dema em semîran didin, em diyariyan jî didin xwedekaran.”
Ferhat Patîyev wiha axivî: “Em bi van sermîneran dixwazin civaka Rûs bi taybetî jî nifşa nû ji jiyana gelê Kurd, çand û hunera gelê Kurd hayader bikin û bizanibin ku gelê Kurd xwedî nasname û çandeke kevnar e. Di heman demê de xwedî fikrekî nû ye û divê nivşa nû vê yekê bizanibe.”
Patîyev wiha axaftina xwe domand: “Ev semîner em tenê îro li vir lidar naxin, em diçin herêmên Rûsyayê yên cuda-cuda jî lidar dixin. Ev bû çar sal em xebatekî wisa didin meşandin. Bi hezaran ciwanên ji Rûsyayê, di perwerdeya me de cih girtine. Em dikarin bibêjin êdî rastî û çanda gelê Kurd hêdî-hêdî tê naskirin. Em dest vala naçin semîneran. Ji bo zarokên dibistanan û xwendekarên zanîngehan em diyariyên xwe dibin. Diyariyên ku em dibin, piraniya xwe sembolên ku çanda me îfade dike ne. Kinc û nîşanên ku Otonomîya Federal li ser in, em diyariya ciwanan dikin. Carnan jî pirtûkên destanên gelê Kurd û yên gelên din ên Rûsyayê, yên ku me çap kirine, em diyarî guhdarên xwe dikin. Yek ji wan Wêneçîrokên Kurdî ne, ya din wêneçîrokên gelên Rûsyayê ne, ya sêyan jî Audîopirtûk e, mirov dikare çîrokên têde bixwîne û bi heşt zimanan guhdar bike. Agahiyên ku di civaka Rûsyayê de li ser Kurdan hene, piranî agahiyên berî sed salan e.
Îro di semînerê de jî em ê behsa dîroka Kurdistanê bikin, em ê herwiha behsa keda Kurdan a ku ji bo pêşketina Rûsyayê hatiye dayîn jî, bikin. Li ser foklora Kurdî, cil û bergên netewî mataryalên me hene ku derbarê alavên muzîkê yên Kurdî were dayin. Ya dîtir jî kartonfîlîmekî ku me li ser dîroka gelê Kurd çêkiribû, em ê nîşan bidin.”
