Li Perûyê krîza siyasî ya piştî hilbijartinên serokatiyê ya 13’ê Nîsanê, kûr dibe. Li paytext Lîmayê herî kêm 3 hezar kes bi îdîaya di hilbijartinê de bêusulî hatiye kirin, encamên hilbijartinê protesto kirin.
Xwepêşandan bi banga namzetê muhafazakar ê tund Rafael Lopez Alîaga hate lidarxistin. Xwepêşanderan dirûşmên “Hurmetê nîşanî dengên me bidin” û “Ji hîleyê re na” berz kirin. Lopez Alîaga daxwaz kir ku hilbijartin bên betalkirin û ragihand ku wê xelata pere bê dayîna kesên bêusuliyê îspat bikin.
Li gorî encamên nefermî, zêdeyî sedî 93’yê dengan hatine hejmartin. Li gorî vê namzetê rastgir Keiko Fujimori bi sedî 17, ji bo tûra duyemîn favorî ye. Namzetê çep Roberto Sanchez bi sedî 12 û Rafael Lopez Alîaga bi sedî 11,9 li pey Fujimori ne.
Lê hîna encamên teqez ên hilbijartinê, nehatine eşkerekirin. Juriya Hilbijartinê ya Neteweyî ragihand ku ji ber ku pêvajoya hejmartinê hêdî pêş dikeve û bi hezaran girtek wê bên lêkolînkirin, encam wê navîna meha gulanê zelal bibin.
Li aliyê din mîsyona çavdêriyê ya Yekîtiya Ewropa, ragihand ku îspateke şênber nehatiye dîtin ku di hilbijartinê de hîle hatiye kirin.
Tevî vê yekê, xwepêşander hîn jî îdîa dikin ku pêvajo ne zelal e.
