Ji bo piştgiriya berxwedana Kobanê li navçeya Pîran a Amedê û navçeya Xana Hawêl a Sêrtê meş hatin lidarxistin, li Êlihê jî daxuyaniyek hat dayîn û êrîş hatin şermezarkirin. Di çalakiyan de hat destnîşankirin ku Rojava nirxek hevpar e û Kobanê wijdanê cîhanê ye.
Li Pîranê girse bi pêşengiya DEM Partiyê li Qada Çeşmeyê kom bû û bi pankarta “Dengê xwe bidin Rojava” meşiyan.
Hevserokê DEM Partiyê yê Pîranê Yuksel Bozkurt diyar kir ku destketiyên Kurdan tên hedefgirtin û bang li hêzên navneteweyî kir ku hevgirtina xwe ne bi DAÎŞ’ê re, bi gelê Kurd re nîşan bidin. Parlamenterê DEM Partiyê yê Amedê Serhat Eren diyar kir ku gelê Rojava bi gefa qirkirinê re rû bi rû ye û got, “Rojava nirxek hevpar e, Kobanê wijdanê cîhanê ye.”
Li Xana Hawêlê girse li ber avahiya DEM Partiyê kom bû û bi pankarta “Rojava wijdan e, azadî ye, teslîm nayê girtin” ber bi Birca Saetê ve meşiya.
Parlamentera DEM Partiyê ya Sêrt Sebahat Erdogan Saritaş li wir axivî û diyar kir ku li ser gelê Kobanê gefa qirkirinê dixwin û anî ziman ku li dijî van êrîşan her çar parçeyên Kurdistanê helwestek hevpar hat nîşandan.
Li Êlihê jî ji aliyê Komeleya Zanayên Olî (DA-DER) ve li ber Abîdeya Mafên Mirovan daxuyanî hat dayîn û hat gotin ku êrîş nemirovane ne û bang li gelên cîhanê hat kirin ku bi Rojava re hevgirtinê nîşan bidin.
Mele Abdurrahman Akyuz diyar kir ku li Rojava îradeya jiyana hevpar e hedef tê girtin.
Çalakî û daxuyanî bi dirûşmeya “Bijî berxwedana Rojava” bi dawî bûn.
