Hêzên Sûriyeya Demokratîk (HSD) ragihand ku di hevdîtinên bi Şamê re hatine kirin de lihevkirinek hatiye kirin. Li gorî vê peymanê, hêzên leşkerî dê ji deverên temasê vekişin. Piştî vê yekê, pêvajoya entegrekirina hêzên girêdayî HSD’ê dê dest pê bike. Sê tugayên HSD’ê û yek firqe dê werin avakirin. Tugayek ji Kobanê jî dê bi yek ji firqeyan ve were entegrekirin ku li Helebê ye. Wekî din, mafên Kurdan dê bi qanûnî werin garantîkirin û vegera welatiyên ku neçar mane koç bikin dê were misogerkirin.
Endamê Konseya Hevserokatiyê ya Partiya Yekîtiya Demokratîk (PYD) Salih Muslim, li ser peymanê ji Ajansa Mezopotamyayê (MA) re axivî.
‘DÊ DESTKEFTIYÊN KURDAN BÊN PARASTIN’
Muslim diyar kir ku peyman peymaneke çarçoveyî ye û got: “Ev deklarasyon ji perspektîfa me ve hin xalên girîng dihewîne. Pêşî û herî girîng rewşa leşkerî ye. Avaniya leşkerî ya heyî dê were parastin. Mînak, li Kobanê tugayek leşkerî û li Cizîrê sê tugay dê hebin. Rêveberiyên herêmî dê bi tevahî di bin kontrola me de bin. Hêzên ewlehiyê jî dê di bin kontrola me de bimînin. Destkeftiyên ku Kurdan heta niha bi dest xistine dê werin parastin. Perwerde, sazî û rêxistin dê wekî xwe berdewam bikin. Hêzên ewlehiya navxweyî dê li cihê xwe bimînin. Hejmareke sînorkirî ya xebatkaran ji hin saziyên dewletê dikarin li hin deveran hebin, lê rêveberî dê bi tevahî di destê me de be.”
‘BI PEYMANÊ PÊŞÎ LI XETEREYAN HAT GIRTIN’
Muslim diyar kir ku hîn der barê hûrgiliyên din ên peymanê de agahiyên zelal nînin û got: “Dewlet gelek spekulasyon û daxuyaniyên pirole dide. Lê ev rastî nîşan nadin. Ji bo me mijara herî girîng agirbest bû. Vê pêvajoyê (peymanê) pêşî li komployeke mezin a li dijî me û bi giştî ya Kurdan girt. Armanca vê komployê tasfiyekirin û bindestkirina Kurdan û berfirehkirina wan ber bi Başûrê Kurdistanê ve bû. Bi vê peymanê re, ev xeter ji holê rabû.”
‘DIVÊ GEL HIŞYAR BE’
Muslim diyar kir ku cîbicîkirina peymanê li qadê bi Şamê ve girêdayî ye û got: “Lêbelê, divê gel hişyar be. Ji ber ku peymanên berê nehatin pabendkirin. Peymana 10’ê Adarê nehat cîbicîkirin. Peymana der barê Şêxmeqsûdê ya 1’ê Nîsanê de jî nehat cîbicîkirin. Ji ber vê yekê, girîng e ku em di her warî de, ji parastina xwe bigire heya ewlehiyê, amade bin. Em ê tedbîrên pêwîst jî bigirin.”
‘DÊ KOÇBER VEGERIN’
Muslim behsa vegera welatiyên ku ji deverên wekî Efrîn, Serêkaniyê û Şêxmeqsûdê neçar mane koç bikin kir û got: “Gelên ku ji herêmên wekî Efrîn, Serêkaniyê û Girê Spî neçar man koç bikin, dê vegerin ser axa xwe. Ev pêvajo dê di rojên pêş de were bicîhanîn.”
Muslim her wiha destnîşan kir ku DYA û Fransa di rola garantor de ne û got: “Wekî din, başûrê Kurdistanê jî beşeke ji vê pêvajoyê ye. Di encamê de, ev peyman destpêkek e, gavek girîng e ber bi pêşveçûnekw din ve.”
