Însiyatîfa Malbatên Pirsûsê di mehan 135an a Komkujiya Pirsûsê de ji bo bîranîna 33 kesên jiyana xwe ji dest dabûn, li ber Navenda Çandê ya Turkan Saylan a li Alsancakê hatin cem hev, daxuyaniya çapemeniyê dan û çalakiya rûniştinê li dar xistin. Di dema daxuyaniyê de wêneyê kesên ku jiyana xwe ji dest dabûn hat hildan û pankarta “Dê tu xewn nîvco nemîne” vekirin. Di dema daxuyaniyê de gelek caran dirûşmên “Ji Pirsûsê re edalet, ji kesî re edalet” hat berzkirin. Daxuyaniya çapemeniyê li ser navê girseyê ji aliyê endamê Partiya Sosyalîst a Bindestan (ESP) Onder Aktaş ve hat xwendin.
Onder Aktaş ji bo yên di Komkujiya Pirsûsê û Gara Enqereyê de jiyana xwe ji dest dane banga edaletê kir û got: “Di van rojên bi êş ên Cotmehê de; em careke din Komkujiya Gara Enqereyê ya dîsa bi heman êş û hêrsê bi bîr tînin. Di êrişa bombeyên zindî de ku bi dirûşma ‘Em şer naxwazin, aştî niha’ hezaran kesên ber bi Enqereyê ve diçûn hatin armanc girtin, 103 kevokên me yên aştiyê ji nav me koç kirin.”
Onder Aktaş da zanîn ku di rojevê de ye ku hin endamên DAIŞê ji Sûriye û Iraqê radestî Tirkiyeyê bêne kirin; di van lîsteyan de yek ji berpirsên Pirsûsê Îlyas Aydin û bersûcê fîrarî yê Komkujiya Gara Enqereyê ya 10ê Cotmehê Savaş Yildiz jî hene û wiha pêde çû: “Divê hemû berpirsên rastîn bên eşkerekirin û aliyên birêxistinkirî yên li pişt komkujiyên Pirsûsê û 10ê Cotmehê derkevin holê. Divê li dijî hemû kesên ku îhmal yan jî berpirsiyariya wan a bi zanebûn heye, birêvebirên herêmî û îdarî jî di nav de, lêpirsînên serbixwe û bêalî bêne dest pê kirin. Divê biryarên nepenîtiyê yên li ser dosyayan bêne rakirin û bersûcên fîrarî di zûtirîn dem de derkevin dadgehê. Divê her du komkujî jî di çarçoveya sûcên dijî mirovahiyê de bêne nirxandin.“
