Partiya Wekhevî û Demokrasiyê ya Gelan (DEM Partî) li pêşiya şaredariyê li dijî tayinkirina qeyûman a li ser Şaredariya Qaxizmanê daxuyanî da. Cîgira Seroka Koma DEM Partiyê Gulîstan Kiliç Koçyigît, parlamenterên DEM Partiyê Sumeye Boz, Nejla Demir, Heval Bozdag û Yilmaz Hun tevli bûn.
Di daxuyaniyê de gelek caran dirûşma “Qeyûm talan e” hatin berzkirin.
Di daxuyaniyê de pêşî Hevseroka DEM Partiyê ya Qersê Arzu Savaş Derman axivî. Arzu Savaş Derman got, “Em careke din di serdemeke ku bêhiqûqî di lûtkeyê de ye derbas dibin. Gel vîna xwe diyar kir û hevserokên xwe hilbijartin. Em ê her tim aştiyê ji bo hemû gelên Tirkiyeyê biparêzin û tu carî qeyûm qebûl nakin.”
Piştre Hevşaredarê Qaxizmanê Mehmet Alkan axivî û diyar kir ku ji ber hincetên ne rast ceza li wî hatiye birîn û anî zimam ku ew ê serî netewînin.
Di dawiyê de Cîgira Seroka Koma DEM Partiyê Gulîstan Kiliç Koçyîgît mafê axaftinê girt. Gulîstan Kiliç Koçyîgît destnîşan kir ku gelê Qaxizmanê bi gelek pirsgirêkan re têdikoşe û diyar kir ku armanca qeyûm tenê desteserkirina ked û vîna gel e. Gulîstan Kiliç Koçyîgît got; “Hûn bi qasî ku dixwazin qeyûm tayîn bikin, bigrin lê wê kesek jî serî li hemberî we netewîne.”
Daxuyanî bi çepik û dirûşmeyan bi dawî bû.
