Rêxistina Mafên Mirovan a Rojhilatê Kurdistanê di derbarê girtin, zext û binçavkirinên ku dewleta Îranê li ser welatiyên Kurd li Rojhilatê Kurdistanê dimeşîne de agahiyên nû parve kir.
Li gor agahiyên rêxistinê parve kirine, mamostayê olî yê bi navê Luqman Emînî yê xelkê bajarê Ciwanro yê Rojhilatê Kurdistanê ji aliyê desteya taybet a mamostayên olî ya Tehranê ve bi tometa ‘bêrêzîkirin’ cezayê sê sal û mehek girtîgeh, her wiha qedexeya heta hetayî ya lixwekirina cilên melatiyê lê hat birîn. Mela Luqman Emînî beriya niha jî çend carek bi tometên nerewa hatibû binçavkirin.
Hat gotin roja 28’ê Tebaxê jî di çarçoveya zextên sîstematîk ên li ser mamostayên Rojhilatê Kursdistanê de, wezareta Îtlaeta Îranê her çar endamên Yekitiya Mamostayên Sine yên bi navê Luqman Efzelî, Selah Mîrzayî, Mecîd Kerîmî û Nesrîn Kerîmî bangî îfadeyê kirine, gef li wan xwarine. Hat gotin sedemê bangkirina wan jî ewe ku rojên borî ev mamosta tevlî xwepêşandana ji bo piştgiriya mamostayên ji kar hatine dûrxistin bûne.
Her wiha roja 27’ê Tebaxê jî welatiyê bi navê Peyman Nadiryanî (22) yê xelkê gundê Dernaxe ser bi bajarê Merîwanê ji aliyê hêzên Îranê ve bêyî fermana dadwer hatiye binçavkirin û ber bi cihek nediyar ve birine.
Hat gotin welatiyek bi navê Mihemed Peruze yê xelkê gunê Ney a ser bi bajarê Merîwanê jî ev meheke bêyî fermana dadwer hatiye binçavkirin û heta niha jî çarenûsa wî nayê zanîn.
Hatiye gotin ku Mihemed Peruze xwedî pêdawîstiyên taybete û sê zarokên wî hene.
Hat diyarkirin çalakvan û girtiyê siyasî Refîq Selîmî jî li girtîgeha Sine ji ber êşkenceyê rewşa wî ya tendirustî têk çûye. Lê rêveberiya girtîgehê nahêle were dermankirin.
Refîq Selîmî di sala 2022’yan de bêyî fermana dadwer hat binçavkirin, 50 rojan di girtîgeha îtlaeta Îranê ya li Sine de di bin êşkence û lêpirsînê de hat hiştin. Refîq Selîmî bi tometa ‘Hewldana li dijî ewlehiya netewî’ cezayê 9 salan lê hatiye birîn.
