Waliyê Herêmê Aleksey Teksler ragihand ku teqîn êvara Çarşemê qewimiye û şewata ku piştî bûyerê derketibû hatiye kontrolkirin. Walî Teksler, di daxuyaniya xwe ya li ser hesabê xwe yê Telegramê de wiha got: “Li gorî agahiyên dawî, di teqîna ku li fabrîkayeke li Kopeyskê qewimî de 10 kesan jiyana xwe ji dest dan, 12 karker jî winda ne.” Li gorî nûçeyên di çapemeniya Rûsyayê de cih girtine, tesîsa ku teqîn lê qewimiye, ji bo armancên leşkerî teqemenî hildiberand. Di dîmenên ku li ser medyaya sanal hatin parvekirin de, şewatek mezin ku bi şev ber bi esman ve bilind dibû û çirûskên ku li her alî belav dibûn, hatin dîtin.
NE ÊRÎŞA DRONÊ YE!
Walî Teksler da zanîn ku bûyer ne ji ber êrîşeke dronê pêk hatiye; lê belê ragihand ku komîteya lêpirsînê ya Rûsyayê derbarê bûyerê de lêpirsîneke cezayî daye destpêkirin. Di teqînê de pênc kes bi giranî birîndar bûn û hat ragihandin ku du ji wan li navenda şewatê tên dermankirin. Ji Sibata 2022an vir ve ku Rûsyayê dest bi êrîşeke berfireh a li ser Ukraynayê kiribû, artêşa Ukraynayê bi êrîşên dronan tesîsên pîşesaziyê yên li nav Rûsyayê dike armanc. Lêbelê, rayedaran diyar kirin ku ev bûyer bi şer re ne girêdayî ye. Bajarê Kopeyskê ku hejmara wê derdora 150 hezarî ye, 1.600 kîlometre dûrî sînorê Ukraynayê ye û li herêmê gelek tesîsên pîşesaziyê hene.
