Hêzên Hikumeta Veguhêz a Sûriyeyê doh piştî ku dor li taxên Şêxmeqsûd û Eşrefiyê yên Helebê girtin, dest bi êrîşê kirin.
Êvarê saet di 17:00 de hêzên hikumeta veguhêz hemû rêyên ketin û derketina taxên Şêxmeqsûd û Eşrefiyê girtin. Berî wê jî çend rê girtibûn û bendên axê bilind kiribûn. Dûre hêzên hikumetê bi dronan êrîş kirin û hewl dan bikevin her du taxan û çekên giran anîn derdora taxan.
Li gel xetereya van tevgeran, Meclîsa Giştî ya Taxên Şêxmeqsûd û Eşrefiyê bang li şêniyan kir ku li dijî girtina rêyan û dorpêça berdewam dakevin qadan.
Li ser vê bangê şênî herikîn kolanên sereke yên her du taxan, da ku nerazîbûna xwe ya li dijî dorpêçê nîşan bidin. Bi sedan welatî li hember hêzên hikumeta veguhêz derketin û ev kiryar bi dirûşmên silavkirina berxwedana Şêxmeqsûdê û Eşrefiyê û daxwaza vekirina rêyan berz kirin.
Hêzên hikumeta veguhêz bi awayekî bêserûber bi gaza îsotê û guleyan êrîşî xwepêşandêran kir. Ji ber gaza îsotê 25 kes rakirin nexweşxaneyê.
Piştre, hêzên hikumeta veguhêz hewl dan bi tank û wesayîtên zirxî ji çar aliyan ve êrişî taxan bikin. Hêzên Ewlekariya Hundirîn ên her du taxan bersiv dan û di encamê de bi çekên sivik û navîn şer qewimî.
Hêzên hikumeta veguhêz hewl dan bi wesayîtên zirxî bikevin her du taxan û pê li çend kesan kirin. Di encamê de 2 kes şehîd bûn û bi dehan jî birîndar bûn. Dûre bi hewanan êrîş pêk anîn.
Derengiya şevê piştî hêzên hikumeta veguhêz ji derdora her du taxan vekişîn, bêdengiyek çêbû.
Li gorî agahiyên destpêkê 2 kes şehîd bûn û zêdetirî 60 kes jî birîndar bûn.
