Gerîlaya YJA Starê Rojîn Rojhat (Zeynep Kaya) di 10’ê Nîsana 2018’an de li qada Xakûrkê di şer de şehîd bû. Ji bo Rojîn Rojhat li gundê Qaçanê yê navçeya Elkê ya Şirnexê konê sersaxiyê hate danîn. Nûnerên partiyên siyasî, rêxistinên civaka sivîl û gelek kes bi pêşengtiya Komeleya Alîkarî û Piştevaniyê ya bi Malbatên Xizmên Xwe li Dergûşa Şaristaniyê Winda Kirin re (MEBYA-DER) re çûn serdanê.
Girseyê li pêşiya gund dirûşma “Şehîd namirin” berz kir û ber bi mala şînê ve meş li dar xist. Serdan, bi deqeyek rêzgirtinê dest pê kir û piştre Hevseroka MEBYA-DER a Şirnexê Emîne Akkuş axivî û got: “Elkê, di têkoşîn azadiyê de bedelên mezin dan. Ya dikeve ser milê me jî ew e ku em xwedî li van bedelan derkevin. Em ê heta dilopa xwîna xwe ya dawî bîranînên wan di têkoşîna xwe de bidin jiyîn.”
Hevseroka DEM Partiyê ya Şirnexê Taybet Belge jî diyar kir ku ew ê xwedî li van nirxan derkevin û ot: “Me bedelên giran da. Elkê, şahida van bedelan e. Me zarokên xwe yên herî xweşik winda kirin. Em ê di têkoşîna me de bijîn. Birêz Ocalan ji bo aştiyê bangek kir. Divê em jî bi qasî ji dest tê xwedî li vê pêvajoyê derkevin.”
Dayika Zeynep Kayayê, Vahîde Kaya jî diyar kir ku keça wê şehîda Kurdistanê ye û ev tişt anî ziman: “Ew ne tenê keça min e. Ew keça hemû Kurdistanê ye û serê gelê Kurdistanê sax be. Bila serê Rêberê Gelê Kurd Abdullah Ocalan sax be. Bijî Serok Apo.”
Serdan piştî kirina duayan bi dawî bû.
