Bi sedan kes beşdarî meşa ku ji hêla Platforma Saziyên Demokratîk ve hate organîzekirin bûn. Di meşê dirûşmeyên piştgiriya berxwedana Rojava hatin berzkirin û bertek nîşanî êrîşan dan.
Ji 7 salî heta 70 salî şêniyên taxê û jin bi pitikên xwe re beşdarî çalakiyê bûn. Welatiyên derketin ber şibakeyan bi çepik û tilîliyan piştgirî dan meşê. Piştî gel gihîşt meydanê û li wir daxuyaniyek da.
Hevserokê DEM Partiyê yê Mêrdînê Nîhat Gokalpdi çalakiyê de axivî û got, “Gelê Kurd li her çar parçeyên Kurdistanê yek beden e. Ger guleyek li dijî Kurdên li parçeyekî din ê Kurdistanê were avêtin, em wê guleyê wekî guleya li dijî xwe bihesibînin û em ê nêzîkatiya xwe li gorî wê diyar bikin. Ji ber ku raman, ziman, çand, al û axa Kurdan yek in. Kurdistan yek parçe ye.”
Parlamentera DEM Partiyê Bêrîtan Guneş Altin jî diyar kir ku Rojava ji bo Kurdan “xeta sor” e û got, “Êrîşa li ser Rojava îro êrîşa li ser paradîgmaya Birêz Abdullah Öcalan e. Em li vir dubare dikin, wekî Birêz Abdullah Ocalan got, ‘Rojava xeta me ya sor e.’ Divê tu kes bi demarên Kurdan nelîze. Divê tu kes bi hesasiyetên Kurdan nelîze.”
Bêrîtan Guneş Altin bal kişand ser êrîşên li ser taxên Şêxmeqsûd û Eşrefiyeyê yên li Helebê û xwest ku gelê Kurd tenê neyê hiştin û diyar kir ku divê HTŞ ji ber sûcên ku kiriye ji hikûmeta Sûriyeyê vekişe.
