Di belavokeke rayedarên olî yên Durzî de bang li şervanên vê civakê hatibû kirin ku bêyî li ber xwe bidin çekên xwe radest bikin. Hêzên ser bi hikumeta Şamê ya demkî jî ketin nava bajêr.
Lê belê yek ji îmzekarên belavokê Şêx Hîkmet el Hîcrî piştre belavokeke cuda weşand û banga “Rabûna li ber kampanya barbar” kir. El Hîcrî nerazîbûn nîşan da ku Şamê sozên xwe bi cih neaniye.
Li aliyê din, Ajansa Fermî ya ser bi hikumeta Şamê Sanayê ragihand ku hêzên hewayî yên Îsraîlê bombe li bajarê Suwêdayê barandiye.
Sanayê got, “Hêzên hewayî yên hêzên dagirker ên Îsraîlê êrîşî bajarê Suwêdayê dikin.”
Îsraîlê roja Duşemê li derdora Suwêdayê xistibû ku hêzên Şamê lê kom bûbûn.
Wezîrê Parastinê yê Îsraîlê Israel Katz diyar kiribû ku ev yek ‘hişyariyeke vekirî li hemberî rejîma Sûriyeyê ye” û gotibû, “Em ê nehêlin ku zerar bigihêje Durziyên li Sûriyeyê.”
