Navenda Mafên Zarokan FÎSA rapora bi sernavê “Li Tirkiyeyê Mafê Jiyanê ya Zarokan a Sala 2025’an” weşand û rewşa giran a li welêt ragihand. Li gorî raporê di sala 2025’an de herî kêm 892 zarok ji ber sedemên xemsariyê jiyana xwe ji dest dane.
XEMSARIYA SAZIYÊN DEWLETÊ YÊN KU RÊ LI BER MIRINAN VEKIRINE
Hat gotin ku piraniya mirinan ji ber negirtina tedbîrên pêwîst ji aliyê dewletê ve rû dane. Li gorî raporê, herî kêm 103 zarok di bûyerên têkildarî saziyên giştî an jî ji ber xemsariyê de jiyana xwe ji dest dane. Mirinên din jî ji ber sedemên wekî tundî, xemsarî, hewandina çekan û qezayên li cihê kar bûn.
95 ZAROK JIYANA XWE JI DEST DAN
Di raporê de hat gotin ku 95 zarok di qezayên kar de jiyana xwe ji dest dane. Hat diyar kirin ku di nav van mirinan de zarokên ku di Navendên Perwerdehiya Pîşeyî de bi statuya ‘xwendekar’ dihatin xebitandin jî hene.
33 MIRINÊN GUMANBAR
Di berdewamiya raporê de hat daxuyandin ku herî kêm 33 zarokan bi awayekî guman jiyana xwe ji dest dane. Hat gotin ku binpêkirinên mafan ên zêde, pirsgirêkên di mijara xwegihandina xizmetê de, xizanî, tenêtî, tundî, dûrxistin û bêewletî û beêtemînatî çendek sedemên sereke yên van mirinên zarokan in. Hat gotin ku ev mirin, encama polîtîkaya qels a di mijara parastina tenduristiya ruhî ya zarokan e.
Her wiha hat gotin ku mirina zarokan ne bûyerên takekesî ne, ji ber faktorên avahîsaziyê yên wekî xizanî, pirsgirêkên gihîştina xizmetguzariyan, tundî û bêewlehiyê zêde dibin.
